ԵՐԵՎԱՆ, 21 հունիսի – Sputnik. Հայաստանում այս պահին աղիքային հիվանդությունների կտրուկ աճ չկա: Այսօր լրագրողների հետ հանդիպման ժամանակ այս մասին ասաց Առողջապահության նախարարության «Հիվանդությունների վերահսկման և կանխարգելման ազգային կենտրոնի» վարակիչ հիվանդությունների համաճարակաբանության բաժնի պետ Լիանա Թորոսյանը:
«Նախորդ շաբաթ 350 նախնական ախտորոշմամբ աղիքային վարակիչ հիվանդության դեպք է արձանագրվել, բայց դա վերջնական թվերը չեն, քանի որ կարող են լինել դեպքեր, երբ հիվանդությունը ժխտվի: Այս ժամանակահատվածի համեմատ այդ թվերը վախեցնող չեն»,– ասաց նա։
Թորոսյանի խոսքով` մայիսին 100.000 բնակչի հաշվարկով աղիքային վարակիչ հիվանդության ցուցանիշը կազմել է 28,9 տոկոս (700 դեպք), որի 12.9 տոկոսը կազմել են սալմոլենոզը, 5,9 տոկոսը` դիզենտերիան, 37, 9 տոկոսը` ճշտված հարուցիչով աղիքային վարակները, 48,5 տոկոսը`չճշտված հարուցիչով աղիքային վարակները:
«Դեռևս ամառվա առաջին ամիսն է ավարտվում, իսկ մենք դեռ մինչև հոկտեմբերի վերջ պետք է այնպես անենք, որ այս թվերը կտրուկ աճի միտում չունենան»,– նշեց մասնագետը։
Որպեսզի ցուցանիշները չաճեն, Թորոսյանը հորդորեց հետևել սննդի օգտագործման կանոններին։
«Եթե մթերք եք գնում, ապա պարտադիր նայեք պահպանման ժամկետը: Սնունդը տուն բերելուց հետո տեղավորեք սառնարանում և մի պատրաստեք սնունդը մեծ չափաբաժիններով: Եթե, այնուամենայնիվ, սննդից մի չափաբաժին մնացել է, պահպանեք այն փակ տարաներում: Եթե եփված մսեղեն եք պահել սառնարանում, ապա օգտագործելուց առաջ անպայման ջերմային մշակման ենթարկեք, որպեսզի եթե անգամ երկրորդային աղտոտվածություն լինի, վերանա: Ձուն օգտագործելուց առաջ պարտադիր լվացեք»,– ասաց նա։
Թորոսյանը նշեց, որ հայ կանանցից շատերն ափսոսում են հին սնունդը թափել, ինչը կարող առողջական խնդիրների պատճառ դառնալ։
«Ուղղակի հորդորում ենք ձեզ` մի ափսոսեք սնունդը թափել, եթե այն մի քանի օրվա է կամ արդեն հոտ է գալիս, որը հուշում է, որ պիտանի չէ օգտագործման համար: Մի վտանգեք ձեր առողջությունը»,– ասաց նա` խորհուրդ տալով հետևել նաև երեխաների հիգիենայի տարրական նորմերին. ուտելուց առաջ և հետո անպայման լվալ նրանց ձեռքերը, սովորեցնել լվացվել սանհանգույցից օգտվելուց հետո:
Մասնագետը քաղաքից դուրս գնացողներին խորհուրդ տվեց շուտ փչացող սնունդ չվերցնել, չօգտվել չվերահսկվող ցայտաղբյուրներից, խորովածի մնացորդներն էլ տուն չբերել, քանի որ դեպքեր են լինում, երբ ընտանիքի անդամներն այդ խորովածն ուտում են հաջորդ օրը և աղիքային վարակով տեղափոխվում հիվանդանոց:
