ԵՐԵՎԱՆ, 21 հունիսի — Sputnik. RT հեռուստաընկերության կազմում ընդգրկված Ruptly գործակալության պրոդյուսերին վնասել են ռետինե գնդակով։ RT–ն այդ մասին հայտնում է իր տելեգրամ ալիքում` նշելով, որ պրոդյուսերը վնասվածքը ստացել է Վրաստանի խորհրդարանի մոտ տեղի ունեցող անկարգությունները լուսաբանելու ժամանակ։
Նրա խոսքով` վերջին պահին Ռուսթավելի պողոտայում իրադրությունը սրվել է։ Մարդիկ սկսել է գրոհել խորհրդարանի շենքը` կիրառելով քարեր, փայտեր և շշեր։
«Հատուկջոկատայինները ռետինե գնդակներով կրակ են արձակել և արցունքաբեր գազ կիրառել։ Ես փորձեցի նկարել, և հանկարծ սուր ցավ զգացի լյարդիս շրջանում։ Ձեռքով ստուգեցի. արյուն էր հոսում, միանգամից դիմեցի շտապօգնություն», – պատմում է տղամարդը։
Թբիլիսիում տեղի ունեցած բողոքի ակցիան, որը պատասխանն էր Ռուսաստանի Պետդումայի պատգամավորի` Վրաստան ժամանելուն, այս գիշեր վերածվել է անկարգությունների և հակակառավարական ելույթների. տասնյակ մարդիկ տեղափոխվել են հիվանդանոց։ Տուժել են թե՛ ցուցարարները, թե՛ ոստիկանները։
