ԵՐԵՎԱՆ, 21 հունիսի — Sputnik. Թբիլիսիում տեղի ունեցած բողոքի ակցիան, որը պատասխանն էր Ռուսաստանի Պետդումայի պատգամավորի` Վրաստան ժամանելուն, այս գիշեր վերածվել է անկարգությունների և հակակառավարական ելույթների. տասնյակ մարդիկ տեղափոխվել են հիվանդանոց։ Տուժել են թե՛ ցուցարարները, թե՛ ոստիկանները։ Այս մասին հայտնում է Sputnik Գրուզիան։
Թբիլիսիի գլխավոր փողոցներից մեկում` Ռուսթավելի պողոտայում, երեկ երեկոյան մոտ հազար մարդ է հավաքվել։ Նրանց մի մասը որոշել են գրոհով մտնել խորհրդարանի շենք։ Վրաստանի ՆԳՆ ներկայացուցիչները կոչ են արել ցրվել, սակայն ցուցարարները անտեսել են դա, և ոստիկանությունը արցունքաբեր գազ ու ռետինե գնդակներ է կիրառել։
Վրաստանի վարչապետի խորհրդական Դավիթ Սերգեենկոն լրագրողներին հայտնել է, որ տուժել են 30 ակտիվիստ և 39 ոստիկան։ Տուժածների շարքում կան նաև ԶԼՄ–ների ներկայացուցիչներ, այդ թվում` TV Pirveli, Rustavi2 հեռուստաընկերությունների և Առաջին ալիքի աշխատակիցներ։
Ընդդիմության ակցիայի հրահրման պատճառ է դարձել Ռուսաստանի Պետդումայի պատգամավոր Սերգեյ Գավրիլովի վրաստանյան այցը։ Ելույթ ունենալով որպես Ուղղափառության միջխորհրդարանական վեհաժողովի ղեկավար` Գավրիլովը բաց նստաշրջանի ժամանակ նստել է խորհրդարանի խոսնակի աթոռին։
«Եվրոպական Վրաստան» կուսակցության անդամները պաստառներով և աղաղակներով մտել են խորհրդարանի դահլիճ։ Ընդդիմադիրները հայտարարել են, որ իշխանությունները վաճառել են հայրենիքը, քանի որ խորհրդարանում պատվավոր տեղ են տվել մարդուն, որն աջակցում է Աբխազիայի և Հարավային Օսեթիայի անկախությանը, աբխազական պատերազմում կռվել է վրացիների դեմ։ Դրանից հետո մարդիկ սկսել են հավաքել խորհրդարանի պատերի մոտ` պահանջելով խոսնակ Իրակլիա Կոբախիձեի հրաժարականը։
Հայկական խորհրդարանական պատվիրակությունը` ԱԺ փոխխոսնակ Ալեն Սիմոնյանի գլխավորությամբ, հայտնվել է իրադարձությունների կիզակետում. հայ պատգամավորները որոշել են լքել դահլիճը։
