00:00
01:00
02:00
03:00
04:00
05:00
06:00
07:00
08:00
09:00
10:00
11:00
12:00
13:00
14:00
15:00
16:00
17:00
18:00
19:00
20:00
21:00
22:00
23:00
00:00
01:00
02:00
03:00
04:00
05:00
06:00
07:00
08:00
09:00
10:00
11:00
12:00
13:00
14:00
15:00
16:00
17:00
18:00
19:00
20:00
21:00
22:00
23:00
Ուղիղ եթեր
09:00
6 ր
09:25
7 ր
Ուղիղ եթեր
09:32
28 ր
Ուղիղ եթեր
10:00
7 ր
Ուղիղ եթեր
10:07
37 ր
Ուղիղ եթեր
11:00
6 ր
Ուղիղ եթեր
13:00
4 ր
Ուղիղ եթեր
14:00
4 ր
Ուղիղ եթեր
17:00
4 ր
Ուղիղ եթեր
18:00
4 ր
5 րոպե Դուլյանի հետ
On air
18:04
7 ր
Աբովյան time
On air
18:12
43 ր
Ուղիղ եթեր
Լուրեր
19:00
46 ր
ԵրեկԱյսօր
Եթեր
ք. Երևան106.0
ք. Երևան106.0
ք. Գյումրի90.1

Հայկական TV-ները կտուժե՞ն շահումով խաղերի գովազդը կրճատելուց, ո՞վ կշահի

© Pixabay / whekeviРулетка
Рулетка - Sputnik Արմենիա
Բաժանորդագրվել
Վիճակախաղային ծառայություններ մատուցող, շահումով խաղեր կազմակերպող, իսկ եթե իրերն իրենց անուններով կոչվեին՝ խաղամոլության վրա «փող շփող» կազմակերպությունները գովազդի համար միջոցներ առանձնապես չեն խնայում:

Հեռուստագովազդի վրա նման կազմակերպությունները կարող են ամիսը 100-150 միլիոն դրամ և նույնիսկ ավելին ծախսել: Ինչ-ինչ՝ բայց եկամուտների պակաս կամ ընդհատում նրանք չունեն, ի տարբերություն իրենց ճիրաններում հայտնված խաղամոլների:

Բայց բոլոր այդ «շահումով խաղերի» համար էլ, առայժմ՝ գովազդման որոշ սահմանափակման առումով, կարծես թե դժվար ժամանակներ են վրա հասնում: Համենայն դեպս, Ազգային ժողովի կողմից նախօրեին ընդունված նախագիծը՝ «Գովազդի մասին» օրենքում փոփոխություններ կատարելու վերաբերյալ, դա է հուշում:

Սա այն հազվագյուտ դեպքերից է, որ անկախ քաղաքական կամ այլևայլ հայացքներից, պետք է որ հասարակության մեծ մասը ողջունի ընդունված փոփոխությունները, գոնե առանցքային գաղափարական ուղղվածության առումով: Իսկ առանցքայինն այստեղ այն է, որ հեռուստաեթերում (առնվազն) նկատելիորեն սահմանափակվի այդ կարգի «վիճակախաղային կազմակերպությունների» գովազդը:

Игровые автоматы в казино - Sputnik Արմենիա
Խաղատունը լավ բան չէ. Հայաստանում կսահմանափակեն շահումով խաղերի գովազդը

Ճիշտ է, այնպիսի տպավորություն է, որ ամբողջ այդ խաղամոլական, կներեք, բիզնեսը մեծամասամբ արտագաղթել է վիրտուալ տիրույթ, այդ թվում՝ գովազդի առումով, բայց հեռուստատեսությունը տակավին մնում է ազդեցիկ միջոց, ըստ այնմ՝ հեռուստագովազդը նույնպես:

Օրենքի փոփոխությունից կարող են կամ ավելի ճիշտ՝ դժգոհ կմնան հեռուստաընկերությունների ներկայացուցիչները: Կատակ բան չէ, ի վերջո, երբ որևէ տնտեսվարող զրկվում է ամիսը մի 150 միլիոն դրամ կայուն եկամտից: Բայց դա, հուսանք, ժամանակավոր նեղություն կարող է լինել հեռուստաընկերությունների համար, որոնք սահմանափակված խաղամոլական գովազդի բացը կլրացնեն այլ ապրանքների ու ծառայությունների գովազդային եկամուտներով:

Արգելքների կամ փոփոխությունների մասին: Հիմնականներից մեկն այն է, որ հեռուստաալիքներով վիճակախաղի գովազդը «թույլատրվում է ժամը 22:00-ից մինչև 07:00-ն ընկած ժամանակահատվածում, իսկ ռադիոյով՝ ժամը 08:00-ից մինչեւ 20:00-ն ընկած ժամանակահատվածում, բացառությամբ՝ մանկապատանեկան հաղորդումներին նախորդող եւ հաջորդող մեկ ժամվա ընթացքում»:

Կան նաև ժամանակային սահմանափակումներ՝ սահմանված ժամագոտում գովազդի տևողության և կրկնման վերաբերյալ: Բայց կարծում ենք, կարելի էր շատ ավելի խիստ մոտեցում որդեգրել և վիճակախաղային գովազդի թույլատրելիության ժամագոտին հեռուստատեսության դեպքում սահմանել 24:00-ից մինչև 06:00-ն:

Բանն այն է, որ 22:00-ից մինչև 01:00-ի միջակայքում շատ պատանիներ, երիտասարդներ ակտիվ են, ուստիև՝ հասանելի այդ վտանգավոր, դեպի խաղամոլական ճահիճը գայթակղող գովազդային «գոլորշիների» համար:

Мужчина в массажном салоне - Sputnik Արմենիա
Անհատական մերսում, բայց հյուրանոցի ներսում. ինչպես են ինտիմ առաջարկներ արվում սոցցանցերում

Ի լրում, ավելի սահմանափակ ժամագոտին լիովին կընդգծեր այդօրինակ գովազդի և գործունեության հանդեպ մերժողական մոտեցումը:

Ինչ վերաբերում է ռադիոալիքներով վիճակախաղային գովազդին, ապա ինչ էլ ասվի՝ անհասկանալի մնաց առավոտյան ժամը 8-ից մինչև երեկոյան ժամը 8-ը այն թույլատրելու մոտեցումը: Կարելի է կարծես, թե այդ ժամերին հասարակությունը ռադիո չի ունկնդրում: Մինչդեռ դա այնքան էլ այդպես չէ: Ռադիոալիքներ առավելապես ունկնդրում են վարորդները, այդ թվում՝ հանրային փոխադրամիջոցների, հասկանալի է, ներառյալ տաքսիները, չհաշված արդեն հեռախոս-ռադիոընդունիչները: Կարճ ասած, հնարավոր թիրախային խմբերին վիճակախաղային գովազդանյութը կարող է հասանելի լինել ռադիոալիքներով: Այսինքն, այն, ինչ արգելվելու է հեռուստատեսությամբ, կարող է ծաղկել ռադիոալիքներո՞ւմ: Ո՞րն է մոտեցման «աղը», ռադիոընկերությունների եկամուտների ավելացո՞ւմը: Իսկ ի՞նչ կլիներ, եթե «վիճակախաղային գովազդը» ռադիոյով, օրինակ, ընդհանրապես արգելվեր, կամ թույլատրվեր բացառապես գիշերային ժամերին, ասենք՝ 02:00-ից 06:00-ի միջակայքում, ինչը ինքնին անիմաստ կդարձներ այդօրինակ գովազդը, դրա հեռարձակմամբ հանդերձ:

Մի կիսալավ նորություն՝ հատկապես ֆուտբոլասերների համար: Ընդունված փոփոխության համաձայն, մասնավորապես. «Հեռուստահաղորդմամբ ժամը 07:00-ից մինչեւ 22:00-ն ընկած ժամանակահատվածում սպորտային միջոցառումների հեռարձակումների ժամանակ գովազդ թույլատրվում է ոչ ավելի, քան մեկ անգամ՝ յուրաքանչյուր հաղորդումից հետո և միայն հովանավոր կազմակերպության անվան հիշատակմամբ»:

Օրենսդրերենից խոսակցական հայերեն փոխադրած՝ դա նշանակում է, որ այլևս ֆուտբոլային (և այլ մարզական միջոցառումներ) հանդիպումների հեռուստառեպորտաժների ժամանակ մեկնաբանները այլևս զահլա չեն տանի զանազան բուքմեյքեր-մուքմեյքերների մասին հիշեցումներով:

Игрок в карты - Sputnik Արմենիա
Ուզում ենք արդար հարկ սահմանել խաղատների և տոտալիզատորների համար. փոխնախարար

Չնայած, էլի անհասկանալի է կիսատ մոտեցումը: Նկատի ունենք այն, որ, օրինակ, ամենից շատ նայվող եվրոֆուտբոլային հանդիպումների առյուծի բաժինը մեր ժամային գոտում հեռարձակվում է ժամը 23:00-ից հետո, իսկ դրանք էլ ամենից գրավիչն են գովազդային առումով: Գուցե արժե՞ հաջորդ փոփոխության դեպքում մտածել մարզական միջոցառումների, ֆուտբոլային հանդիպումների ռեպորտաժներից այդ խաղամոլական գովասանքն ընդհանրապես արմատախիլ անելու, պարզ ասած՝ արգելելու մասին:

Հա՛, համացանցը. ըստ ընդունված փոփոխության, «վիճակախաղի կազմակերպիչն իրավունք ունի համացանցով գովազդել վիճակախաղը: Սույն պարբերությամբ սահմանված գովազդն արգելվում է իրականացնել մանկապատանեկան, կրթական, բժշկական կայքերի միջոցով: Իսկ լրատվական կայքերում սույն պարբերությամբ հաստատված գովազդը չպետք է գերազանցի տվյալ կայքէջի 20%-ից ավելին»:

Վատ չէ, բայց էլի քիչ է: Հատկապես, նման «խաղեր» կազմակերպող ընկերություններ կան, որ ամսվա ընթացքում շուրջ 10 միլիոն դրամ են դնում իրենց գովազդային «բաններներն» ամեն տեղ խցկելու համար, հատկապես՝ լրատվական կայքերի դեպքում: Դիտման մակերեսի մոտ 1/5-ը նմանօրինակ գովազդին թողնելը, միևնույն է, շատ է: Կարելի է ավելի նվազեցնել:

Ընդհանուր առմամբ, խաղամոլական «գովասանքը» նվազեցնելու՝ արդեն նաև օրենքով ամրագրված մոտեցումը ողջունելի է ու կարևոր, բայց դա քիչ է: Այս «բանկետը» շարունակություն է պահանջում:

Լրահոս
0