ԵՐԵՎԱՆ, 7 հունիսի — Sputnik. ՀՀ կառավարությունն ուզում է արդար հարկեր սահմանել խաղատների և տոտալիզատորների համար։ Այսօր ԱԺ–ում այս մասին ասաց ֆինանսների փոխնախարար Արման Պողոսյանը` ներկայացնելով Հարկային օրենսգրքում փոփոխություններ կատարելու նախագիծը։
Մինչ օրս Հայաստանում ցանկացած մոլախաղ ֆիքսված հարկման տակ է։ Այլ կերպ ասած, նրանց հարկերը, մինչ օրս որևէ կերպ կախված չեն այն եկամտից, որը ստանում են։ Այդ պատճառով, ըստ փոխնախարարի, հիմնականում խաղատներից հարկվող հարկերը կարող են բացարձակ անհամաչափ լինել իրենց շրջանառությանը։
Այդ պատճառով 2020 թվականից բոլոր տոտալիզատորների համար եկամտահարկ է գործելու։ Իսկ ևս մեկ տարի հետո`2021 թվականից, այդ հարկի տակ կմտցնեն նաև շահումներով խաղերը, այդ թվում առցանց խաղատները։ Իսկ այս տարվա ընթացքում նրանց ֆիքսված հարկային վճարումները կավելանան 20%–ով։
Մասնավորապես, խաղատների համար տարեկան 5.5 մլրդ դրամ պետտուրք կսահմանվի։ Ծաղկաձորում, Սևանում, Ջերմուկում և Մեղրիում ավելի ցածր տուրք է գործում, սակայն գրեթե բոլոր խաղատներն առաջվա պես տեղակայված են Երևանի ծայրամասում։
Իսկ 2021 թվականից բոլոր խաղատները ևս հարկ կվճարեն` կախված եկամտից։
