ԵՐԵՎԱՆ, 19 հունիսի — Sputnik. Վահե Գրիգորյանի` Սահմանադրական դատարանի դատավոր նշանակվելը, ՀՀ երկրորդ նախագահ Ռոբերտ Քոչարյանի գործի քննության հարցում կարող է ազդեցություն ունենալ, եթե այլ դատավորներ նույնպես համակարծիք լինեն նրա հետ։ Այսօր լրագրողների հետ զրույցում այս կարծիքը հայտնեց Քոչարյանի պաշտպան Հովհաննես Խուդոյանը։
Երեկ ԱԺ մեծամասնությունը կողմ քվեարկեց ՀՀ նախագահի կողմից ներկայացված Վահե Գրիգորյանի` ՍԴ դատավորի թեկնածությանը։ Վահե Գրիգորյանը Մարտի 1–ի գործով տուժածների իրավահաջորդն է։
«ՍԴ–ն կոլեգիալ մարմին է, և որոշումների կայացումը մեկ անձով պայմանավորված չէ։ Բացի այդ, Գրիգորյանն այս գործով դատավարության մասնակից է եղել, և չի կարող անկաշկանդ ու անաչառ դատավորի կարգավիճակով մասնակցել գործի քննությանը, այսինքն` իր մասնակցությունը բացառող հանգամանք կա»,–ասաց Խուդոյանը։
Նա հավելեց նաև, որ եթե անգամ Գրիգորյանի դեպքում գործի քննության մասնակցությունը բացառող հանգամանք չլիներ, ամեն դեպքում ՍԴ որոշումը, ինչպես արդեն նշեց, կախված է մեծամասնության քվեարկությունից։
Հիշեցնենք` Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշեց Քոչարյանին անձնական երաշխավորությամբ ազատ արձակել։
Մայիսի 20–ին ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, Պաշտպանության նախկին նախարար Սեյրան Օհանյանի և ՀԱՊԿ նախկին գլխավոր քարտուղար Յուրի Խաչատուրովի վերաբերյալ գործի վարույթը դատարանի որոշմամբ կասեցվեց և ուղարկվեց ՍԴ:
Գլխավոր դատախազությունը բողոքարկեց մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20–ի՝ քրեական գործի վարույթը կասեցնելու և Սահմանադրական դատարան դիմելու որոշումը:
