ԵՐԵՎԱՆ, 18 հունիսի — Sputnik. Ոստիկանության Շենգավիթի բաժանմունքի մոտ այս պահին լարված իրավիճակ է։
ՀՀ երկրորդ նախագահ Ռոբերտ Քոչարյանի դեմ հարուցված քրեական գործով դատական նիստին զուգահեռ Քոչարյանի աջակիցներն ու նրան դեմ լինողները դատարանի բակում բողոքի ակցիա էին անում։ Մի պահ իրարանցում ու հրմշտոց առաջացավ, ինչի հետևանքով, բողոքի ակցիա անողների խոսքով, մի քանիսը բերման են ենթարկվել։
Այս իսկ պատճառով էլ բողոքի ակցիա անողները հավաքվել են ոստիկանության Շենգավիթի բաժանմունքի առջև։ Նրանք սպասում են մինչև բերման ենթարկվածներին ազատ կարձակեն։
Ոստիկաններն արգելապատնեշներ են տեղադրել։
Ոստիկանության լրատվական ծառայությունից Sputnik Արմենիային հայտնեցին, որ երեք անձ է ներկայացվել ոստիկանություն` ՀՀ վարչական օրենսգրքի 182–րդ հոդվածի հիման վրա, այն է` ոստիկանության ծառայողի օրինական պահանջը չկատարելը։
Հիշեցնենք, որ Քոչարյանի և մյուսների գործով ՀՀ վերաքննիչ քրեական դատարանում ընթացող այսօրվա դատական նիստը հետաձգվեց։ Նիստի ժամանակ քննվում էր Քոչարյանի պաշտպանների, Սեյրան Օհանյանի պաշտպանների, ինչպես նաև տուժող Արթուր Ավագյանի ներկայացուցիչ Սեդա Սաֆարյանի կողմից դատավոր Արմեն Դանիելյանի ինքնաբացարկի միջնորդությունները։ Դատավորը մերժեց դրանք։
Ավելի վաղ հայտնել էինք, նիստին ներկա չէր Ռոբերտ Քոչարյանը։ Պաշտպան Հայկ Ալումյանը հայտնել էր, քրգործի ծավալն այնպիսին է, որ Քոչարյանի հերթն այսօր մինչև ժամը 18։00–ն հազիվ հասներ` ելույթ ունենալու առումով, այդ իսկ պատճառով էլ նա նախընտրել է այսօր դատական նիստին չներկայանալ։
Դատական նիստն ընթացավ բավականին լարված մթնոլորտում։ Դատավորն անգամ 10 րոպե ընդմիջում հայտարարեց` կրքերը հանդարտվելու համար։
Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշեց Քոչարյանին անձնական երաշխավորությամբ ազատ արձակել։
