ԵՐԵՎԱՆ, 17 հունիսի — Sputnik, Աշոտ Սաֆարյան. ՀՀ վարչապետ Նիկոլ Փաշինյանը եղել է և շարունակում է մնալ «Քաղաքացիական պայմանագիր» կուսակցության առաջնորդը, և ճիշտ կլիներ, եթե նա իր այդ իշխանությունը ֆորմալիզացներ։ Sputnik Արմենիայի հետ զրույցում նման կարծիք հայտնեց քաղտեխնոլոգ Արմեն Բադալյանը` մեկնաբանելով կուսակցության երեկվա համաժողովը։
Ֆորումի ընթացքում ընտրվեց կուսակցության վարչության նոր կազմը։ Վարչության նոր նախագահ դարձավ ոչ թե վարչապետը, այլ տարածքային կառավարման և զարգացման նախարար Սուրեն Պապիկյանը։ Փաշինյանը մնաց վարչության շարքային անդամ։ Ինչպես կարծում է Բադալյանը, վարչապետն այդպիսով ուզում էր լսարանին հասկացնել, որ կուսակցության մեջ ժողովրդավարություն և բազմակարծություն կա, և որ վարչապետը կուսակցության ղեկավար պաշտոնի չի հավակնում։
«Գուցե, նման մոտեցումը արտացոլում է ժողովրդավարության մասին վարչապետի պատկերացումները։ Բայց բոլորին է հասկանալի, որ կուսակցությունում հենց նա է որոշումներ կայացնում, մեզ հայտնի հանգամանքների բերումով։ Այսպես, երկրների մեծամասնությունում խորհրդարանական կառավարման համակարգում վարչապետը գլխավորում է նաև իշխող կուսակցությունը։ Տրամաբանական կլիներ, եթե նույնը լիներ նաև Հայաստանում», – ասում է Բադալյանը։
Նրա խոսքով` հարուստ ժողովրդավարական ավանդույթներով պետություններում կա նաև հստակ ներկուսակցական ժողովրդավարություն իր «թևերով», լոբիստական խմբերով և այլ «ատրիբուտներով»։ Հայաստանում այդ ամենը չկա, կարծում է Բադալյանը։
Փորձագետը համաձայն չէ նաև «Քաղաքացիական պայմանագրում» գաղափարական կարծրատիպերի բացակայության մասին վարչապետի պնդումների հետ։ Նրա խոսքով` գաղափարախոսությունը ցանկացած քաղաքական ուժի սոսնձող գործոնն է։ Կուսակցությունը պետք է ունենա իր հստակ գաղափարական կողմնորոշումները։
Փաշինյանը համաժողովի ընթացքում հայտարարեց, որ ժամանակակից աշխարհում այլևս գաղափարական կարծրատիպեր չկան։ Նրա խոսքով` քաղաքական առումով նրանք ո՛չ լիբերալ են, ո՛չ ցենտրիստ, ո՛չ էլ սոցիալ–դեմոկրատ։ «Քաղաքացիական պայմանագիրը» բացառապես քաղաքացիական կուսակցություն է, ասաց վարչապետը։ Նրա խոսքով` այն հիմնվում է չորս առանցքային սկզբունքների վրա` պետականություն, քաղաքացիություն, ազգային ինքնություն և անհատականություն։
«Բանն այն է, որ «իզմերը» քաղաքական «սոսնձի» դեր են խաղում մեկ կուսակցության մեջ հավաքված մարդկանց համար։ «Իզմերը» ցույց են տալիս այն ճանապարհը, որով իշխանության ղեկին հայտնված կուսակցությունը պետք է տանի իրեն։ Օրինակ, ինչպիսին պետք է լինի տնտեսության մեջ պետության դերը, ինչպիսին պետք է լինեն իշխանություն–հոգևորականություն հարաբերությունները, ինչ քաղաքականություն պետք է վարի պետությունը սեռական փոքրամասնությունների նկատմամբ և այլն», – ասում է Բադալյանը։
Նա կարծում է, որ առանց հստակ գաղափարախոսության կուսակցությունները կարիերիստների միավորում են դառնում։ Բադալյանը հիշեցրեց Փաշինյանի հայտարարություններից մեկը, որը նա արել էր մի քանի ամիս առաջ, այն մասին, որ որոշ մարդիկ իր շրջապատից, իշխանական լծակներ ստանալով, հետագայում «չհանձնեցին» այդ քննությունը և «կոտրվեցին»։
«Ի դեպ, համաժողովի ժամանակ Սուրեն Պապիկյանը մասնավորապես ասաց, որ շուրջ 8 հազար քաղաքացի «Քաղաքացիական պայմանագրին» անդամակցելու հայտ էին ներկայացրել։ Կցանկանայինք իմանալ այդ մարդկանց մոտիվացիան, ինչպես նաև այն, թե ինչ չափանիշով է ընտրությունն արվելու, եթե գաղափարական սկզբունքայնության ցենզը բացակայում է», – նշում է քաղտեխնոլոգը։
Փորձագետի կարծիքով` ներկուսակցական խնդիրների մեծամասնությունը «իզմերի» բացակայության հետևանք է, երբ մարդիկ միանում են այս կամ այն թիմին բացառապես իշխանության հասնելու նպատակով։
Այդ դեպքում հիմնական «գաղափարախոսություն» է դառնում այն նույն կարիերիզմը։
