ԵՐԵՎԱՆ, 24 մայիսի — Sputnik. Դաշնակցությունը ռեբրենդինգ է սկսել իր ընտրազանգվածը մոբիլիզացնելու համար։ Այսօր հրավիրված ասուլիսի ժամանակ այս մասին ասաց քաղտեխնոլոգ Արմեն Բադալյանը։
ՀՅԴ–ն երեկ` մայիսի 23–ին, հանրահավաք էր կազմակերպել Ազատության հրապարակում և «դեղին քարտ» ցույց տվել իշխանությանը։ Ակցիայի ընթացքում ՀՅԴ Գերագույն մարմնի ներկայացուցիչ Իշխան Սաղաթելյանը նշեց, որ մեկ տարի է անցել, սակայն ժողովրդի սպասումները` կապված նոր իշխանությունների հետ, չեն արդարացել։
Ինչպես նշեց Բադալյանը, Դաշնակցությունը երկար ժամանակ կոալիցիայի մեջ է եղել Հայաստանի հանրապետական կուսակցության հետ և ՀՀԿ կառավարման վերջում դիտարկվում էր որպես դրա կցորդ։
«ՀՅԴ–ն, այսպես թե այնպես, ունի իր ընտրազանգվածքը` մոտ 5-10 տոկոս։ Բայց այն մոբիլիզացնելու համար պետք է ռեբրենդինգ անցկացնել», – ասաց Բադալյանը։
Այդ գործընթացը բավական բարդ է ու երկար, բայց արդեն մեկնարկել է, քանի որ ոչ ոք հստակ չգիտի, թե երբ կկայանան հաջորդ ընտրությունները։
Նշենք նաև, որ ավելի վաղ ՀՅԴ–ն հայտարարություն էր տարածել և քննադատել Նիկոլ Փաշինյանի` դատարանների շենքերն արգելափակելու կոչը։ Կուսակցության կարծիքով` նման գործողությունները երկրում ստեղծում են թշնամանքի և անհանդուրժողականության մթնոլորտ։
