ԵՐԵՎԱՆ, 15 հունիսի — Sputnik. Այսօր առավոտյան մահացել է իտալացի ռեժիսոր Ֆրանկո Ձեֆիրելին։ 96 տարեկան ռեժիսորը մահկանացուն կնքել է Հռոմում գտնվող իր տանը։ Ֆլորենցիայի քաղաքապետ Դարիո Նարդելան այս մասին հայտնել է Twitter-ի իր էջում։
Նարդելան նշել է` կյանքից հեռացավ համաշխարհային մշակույթի մեծագույն մարդկանցից մեկը։
«Ցավակցում ենք մտերիմներին։ Հրաժեշտ են տալիս քեզ, սիրելի ուսուցիչ։ Ֆլորենցիան քեզ երբեք չի մոռանա», - գրել է քաղաքապետը։
Ձեֆիրելիի հիմնադրամի ներկայացուցիչներն իրենց հերթին հայտնել են, որ ռեժիսորը մահացել է տևական հիվանդությունից հետո և հուղարկավորվելու է Ֆլորենցիայում՝ Porte Sante գերեզմանատանը։
Հիշեցնենք՝ ռեժիսորի աշխարհում ամենասիրված ֆիլմերից է «Կամակոր կնոջ սանձահարումը»։
