ԵՐԵՎԱՆ, 11 հունիսի — Sputnik. ՀՀ ՊՆ–ն ուզում է ԶՈւ կազմում ավելի շատ պայմանագրային զինծառայողներ տեսնել, և խնդիրը միայն զինվորների քանակը պահելու մեջ չէ, կարծում է ռազմական փորձագետ Դավիթ Հարությունովը։
ՀՀ ԱԺ–ն հունիսի 4-ին հավանության արժանացրեց մի օրինագիծ, որը նախատեսում է ԶՈւ պայմանագրային ծառայության անցնելու ցանկություն ունեցող քաղաքացիների տարիքային շեմը բարձրացնել մինչև 40 տարեկան։
Ինչպես Sputnik Արմենիայի հետ զրույցում նշեց փորձագետը, բանակն ամբողջությամբ պայմանագրային ծառայողներով համալրելու կամ պայմանագրայինների թիվը գոնե մինչև 50%–ի հասցնելու խնդիր դեռ դրված չէ։
«Ամենայն հավանականությամբ, շարունակվում է վերջին տարիների քաղաքականությունը, որը միանգամից երկու հարցի լուծում է ենթադրում։ Եվ դրանցից մեկն է համալրել անմիջական վտանգ ներկայացնող մարտական դիրքերը պայմանագրային զինծառայողներով», – ասաց Հարությունովը` նշելով, որ հարցը ֆինանսական հնարավորությունների տիրույթում է։
Երկրորդը` իհարկե բանակի քանակային հարցը լուծելու փորձը։ 90-ականների ժողովրդագրական ճգնաժամը, ըստ նրա, այսօր խիստ ազդում է ԶՈւ թվաքանակի վրա։
Օրենքում փոփոխություններ կատարելը թույլ է տալիս ծառայության ներգրավել մարդկանց խմբեր, որոնք ներկա պահին սահմանված տարիքի հետ կապված նման հնարավորություն չունեն։
Հաշվի առնելով Հայաստանում գործազրկության բարձր մակարդակը, նման փոփոխությունների ընդունումը բանակում աշխատավարձերի բարձրացման հետ մեկտեղ կարող է բավական հետաքրքիր առաջարկ դառնալ մինչև 40 տարեկան անձանց համար։
Ընդհանուր առմամբ պայմանագրային զինծառայողների աշխատավարձերի բարձրացումը փորձագետը հասունացած անհրաժեշտություն է համարում, հատկապես նրա գրավչությունը քաղաքացիական մասնագիտությունների համեմատ բարձրացնելու հայեցակարգի շրջանակում։ Այս խնդիրը վերաբերվում է ոչ միայն Հայաստանին, սակայն այստեղ այն ավելի սուր է դրված։
Այդկերպ նոր պայմանագրային զինծառայողների ներգրավումը, Հարությունովի կարծիքով, թույլ կտա թուլացնել լարվածությունը հասարակության մեջ՝ կապված առաջնագծում 18 տարեկան ժամկետային զինծառայողների մարտական հերթապահության հետ, ինչպես նաև ընդհանուր առմամբ կբարելավի իրավիճակը քանակային տեսանկյունից։
Sputnik Արմենիայի հետ զրույցում պայմանագրային զինծառայողներից մեկն իր հերթին նշեց, որ դեռ աշխատավարձերի բարձրացման ազդեցության մասին խոսելը վաղ է, քանի որ զինվորները դեռ չեն հասցրել ստանալ այդ աշխատավարձը։
Մյուս կողմից, մեր զրուցակիցը նշում է, որ պայմանագրային ծառայության գրավչությունը խիստ կախված է ծառայության/ստորաբաժանման վայրից։
«Հասկանալի է, որ քաղաքային պայմաններում ծառայելն ավելի լավ է, այդ դեպքում մրցակցությունը մեծ է», – ասաց պայմանագրային զինծառայողը։
Մեր մյուս զրուցակիցը ուշադրություն է դարձնում այն հանգամանքին, որ աշխատավարձերը փաստորեն կավելանան մոտ 20 հազար դրամով բոլոր պայմանագրային զինծառայողների համար։
Հարցին, թե ինչպես դա կանդրադառնա ծառայելու ցանկություն ունեցողների քանակի վրա, նա նշեց, որ նրանց համար, ովքեր 150 հազար էին ստանում և կարողանում են փող հաշվել լրացուցիչ 20 հազարը հաստատ նշանակություն ունի։
Ինչ վերաբերում է ծառայության ընդունելու տարիքային շեմի ավելացմանը, ապա զինվորականները համոզված են, այդ տարիքում այդքան էլ շատ չեն կայուն աշխատավարձով աշխատատեղերը, այնպես որ լիովին կարելի է հոսք ակնկալել։
Նշենք, որ 2019 թվականի մայիսի սկզբին ՀՀ վարչապետ Նիկոլ Փաշինյանը հայտարարեց, որ շուրջ 700 ժամկետային զինծառայող փոխարինվել են պայմանագրային զինծառայողներով։
