«Մարտի մեկի» գործով մեղադրյալ, ՀԱՊԿ նախկին գլխավոր քարտուղար Յուրի Խաչատուրովի ելքը չի թույլատրվել այն պատճառով, որ առկա չի եղել վարույթն իրականացնող մարմնի՝ պատշաճ դատավարական փաստաթղթով՝ որոշմամբ ձևակերպված թույլտվություն, հայտարարել է ՀՀ ոստիկանությունը։ Խաչատուրովի փաստաբան Միհրան Պողոսյանը Sputnik Արմենիայի հետ զրույցում մեկնաբանել է ոստիկանության պարզաբանումը՝ կապված Խաչատուրովի սահմանահատման արգելքի հետ։
«Ես խորհուրդ կտամ ոստիկանությանը՝ գործել օրենքով սահմանված իրենց լիազորությունների շրջանակում և անհիմն ու յուրովի չմեկնաբանել քրեադատավարական օրենսգիրքը»,-ասում է Խաչատուրովի փաստաբանը։
Միհրան Պողոսյանն արձանագրում է, որ տեղի է ունեցել պաշտոնատար անձանց կողմից իրենց լիազորությունների չարաշահում և այս մեկնաբանությունն, ըստ փաստաբանի, ուղղված է կոծկելու տեղի ունեցած չարաշահումները։
«Սկսենք նրանից, որ որևէ պաշտոնատար անձ իրավասու չէ սահմանահատումների արգելք դնել Յուրի Խաչատուրովի և ընդհանրապես ցանկացած անձի նկատմամբ, ում համար որպես խափանման միջոց է կիրառված գրավը, օրենսդրական որևէ հիմնավորում չկա»,-նշում է Պողոսյանը։
Նրա խոսքով, ոստիկանությունն իրեն լիազորություն է վերապահում մեկնաբանել դատարանի որոշումն, ինչն անընդունելի է:
