ԵՐԵՎԱՆ, 10 հունիսի — Sputnik. «Մարտի մեկի» գործով մեղադրյալ, ՀԱՊԿ նախկին գլխավոր քարտուղար Յուրի Խաչատուրովի ելքը չի թույլատրվել այն պատճառով, որ առկա չի եղել վարույթն իրականացնող մարմնի՝ պատշաճ դատավարական փաստաթղթով՝ որոշմամբ ձևակերպված թույլտվություն: Այս մասին հայտարարություն է տարածել ՀՀ ոստիկանությունը։
Ինչպես արդեն հայտնել էինք, Խաչատուրովը հունիսի 8-ին Բագրատաշենի սահմանային անցակետով փորձել էր մեկնել Վրաստանի Տետրիցկարո համայնք, բայց նրան թույլ չէին տվել։ Նրա փաստաբանը դիմել է Մարդու իրավունքների պաշտպանին։
«ՀՀ քրեական դատավարության 143-րդ հոդվածի 6-րդ մասը սահմանում է, որ եթե մեղադրյալը թաքնվել է քրեական վարույթն իրականացնող մարմնից կամ առանց թույլտվության մեկնել է այլ տեղանք, դատախազը դիմում է դատարան` գրավը պետության եկամուտ դարձնելու միջնորդությամբ: Մեղադրյալը, որի նկատմամբ որպես խափանման միջոց ընտրված է գրավը, այլ տեղանք կարող է մեկնել բացառապես վարույթն իրականացնող մարմնի թույլտվությամբ»,– նշված է ոստիկանության հաղորդագրության մեջ։
Վարույթն իրականացնող մարմնի թույլտվությունը պետք է արտահայտվի ոչ այլ կերպ, քան համապատասխան դատավարական փաստաթղթով՝ որոշմամբ: Մինչդեռ տվյալ դեպքում, ըստ ոստիկանության, նման որևէ որոշում կայացված չի եղել, և դատարանի կողմից ՀՀ ոստիկանության քրեական հետախուզության գլխավոր վարչությանն ուղղված գրությունը հիմնված չի եղել նման դատավարական որոշման վրա:
«Ելքի թույլտվությունը պատշաճ դատավարական փաստաթղթով՝ որոշմամբ արտահայտված լինելու մոտեցումը բխում է ՀՀ քրեական դատավարության օրենսգրքի 143-րդ հոդվածի տրամաբանությունից, որում օրենսդիրը, քանիցս օգտագործելով «թույլատրել» եզրույթը, դրա արտահայտման ձև է համարում դատարանի որոշումը: Օրինակ` նույն հոդվածի 1-ին մասը սահմանում է, որ դատարանի թույլտվությամբ որպես գրավ կարող է ընդունվել անշարժ գույքը: Իսկ անշարժ գույքը որպես գրավի առարկա թույլատրելը կարող է արտահայտվել բացառապես դատարանի՝ խափանման միջոց գրավը թույլատրելի ճանաչելու մասին որոշմամբ»,–հայտնում է ոստիկանությունը:
Բացի այդ, մեղադրյալին այլ տեղանք մեկնելը թույլատրելը կամ չթույլատրելը պատշաճ դատավարական փաստաթղթով ձևակերպելու պահանջը բխում է նաև դրա հիմնավորվածությունն ու պատճառաբանվածությունն ապահովելու անհրաժեշտությունից: Ըստ ոստիկանության` մեղադրյալի մեկնելը թույլատրելու օրինականությունն ու հենց նրա իրավունքների պաշտպանությունն են ենթադրում, որ մեկնելը թույլատրելու կամ չթույլատրելու մասին դատարանի դիրքորոշումը պետք է լինի պատճառաբանված։ Այն պետք է արտահատվի պատշաճ այնպիսի փաստաթղթով, որը կարող է տալ վիճարկելու հնարավորություն, ինչը ևս բացակայել է Խաչատուրովի դեպքում:
Հիշեցնենք` Խաչատուրովի պաշտպան Միհրան Պողոսյանը վստահեցրել էր, որ հետամուտ են լինելու այդ հարցով, որպեսզի բոլորը ենթարկվեն պատասխանատվության, որ ի վերջո ՀՀ լինեն այնպիսի իրավապահ մարմիններ, որոնք իրենց գործառույթները կիրականացնեն բացառապես օրենքով:
Յուրի Խաչատուրովը մեղադրվում է ՀՀ քրեական օրենսգրքի 300.1-րդ հոդվածի 1-ին մասով (ՀՀ սահմանադրական կարգը տապալելը):
