ԵՐԵՎԱՆ, 6 հունիսի — Sputnik. Մարդու իրավունքների պաշտպան Արման Թաթոյանը Մանվել Գրիգորյանի հարցով այսօր առավոտյան նամակ է ուղղել Արդարադատության նախարարին, իսկ երեկ գիշերը այցելել է հիվանդանոց տեղափոխված Գրիգորյանին։
Այս մասին այսօր լրագրողներին հայտնեց Թաթոյանը։
«Ես արդարադատության նախարարին ուղղված նամակով, որն այսօր առավոտյան եմ ստորագրել, որովհետև այցը երեկ երեկոյան ենք արել, հարցեր եմ առաջադրել, մասնավորապես արդյո՞ք ՔԿՀ-ի պայմաններում կան հնարավորություններ Մանվել Գրիգորյանին ցուցաբերելու անհրաժեշտ բուժօգնությունը, և եթե կան, որոնք են դրանք, եթե չկան, քննարկել պատշաճ բուժօգնության տրամադրելու հարցը»,– ասաց նա։
Պաշտպանը հաստատել է, որ Մանվել Գրիգորյանը հրաժարվում է բուժօգնությունից, դեղամիջոցներ ընդունելուց, այդ թվում՝ շաքարային դիաբետի հետ կապված, ինչը բացասաբար է անդրադառնում նրա առողջության վրա։
ՄԻՊ–ը հայտնեց նաև, որ այս հարցով եզրահանգումներ կանի միայն ուսումնասիրություններն ավարտելուց հետո, բայց, քանի որ գործը գտնվում է դատական վարույթում, այդ հանգամանքը կաշկանդում է պաշտպանի աշխատանքը։
Հիշեցնենք, որ Գրիգորյանը 2 օր է` հրաժարվել է բուժումից, քանի որ նրան, իր կամքին հակառակ, «Նաիրի» ԲԿ–ից տեղափոխել են դատապարտյալների հիվանդանոց։
«Գրիգոր Լուսավորիչ» ԲԿ–ի վիրաբուժության գծով տնօրենի տեղակալ Արտակ Մանուկյանը հունիսի 6–ին Sputnik Արմենիայի հետ զրույցում հայտնել էր, որ Գրիգորյանը վերակենդանացման բաժանմունքում է, վիճակը ծանր է, շնչում է թթվածնի օգնությամբ։
Հիշեցնենք, որ մայիսի 4-ին Մանվել Գրիգորյանի պաշտպանները հանցագործության մասին հաղորդում էին ներկայացրել ոստիկանություն` ասելով, որ նրան «Նաիրի» ԲԿ–ից իր կամքին հակառակ են տեղափոխել դատապարտյալների հիվանդանոց։
Նույն օրը Գրիգորյանի և նրա կնոջ` նույն գործով ամբաստանյալ Նազիկ Ամիրյանի դատական նիստն էր, որին Գրիգորյանը չէր մասնակցում` առողջական խնդիրների պատճառով։ Մեղադրյալի բացակայության պատճառով էլ դատարանը որոշեց հետաձգել նիստը։ Հաջորդ դատական նիստը կկայանա հունիսի 11–ին, ժամը 12–ին։
Մանվել Գրիգորյանը մեղադրվում է 6 հոդվածով` ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթման միջոցով 37 միլիոն դրամ արժողությամբ գույքի հափշտակությունը կազմակերպելու մեջ:
Նրան մեղադրանք է առաջադրվել 2018 թ. հունիսի 19-ին։
