ԵՐԵՎԱՆ, 3 հունիսի – Sputnik. ՀՀ երկրորդ նախագահ Ռոբերտ Քոչարյանի նկատմամբ անձռնմխելիության հիմքով քրեական հետապնդումը չդադարեցնելու վերաբերյալ բողոքը քննող Վերաքննիչ քրեական դատարանի դատավոր Վազգեն Ռշտունին քիչ առաջ ինքնաբացարկ հայտնեց։
«Հաշվի առնելով այն հանգամանքը, որ դատավոր Ալեքսանդր Ազարյանն այս գործով ինքնաբացարկ էր հայտնել, կարող էր տպավորություն ստեղծվել, թե իմ կողմից մեծ ցանկություն կա այդ բողոքը քննելու»,– ասաց Ռշտունին։
Հիշեցնենք, որ մեղադրանքի կողմը նախագահող դատավոր Վազգեն Ռշտունուն ինքնաբացարկ հայտնելու միջնորդություն էր ներկայացրել՝ հիմքում դնելով այն հանգամանքը, որ նա դեռևս նախորդ տարի լրատվամիջոցներից մեկին հարցազրույց է տվել` նշելով, որ համաձայն է նույն դատարանի դատավոր Ալեքսանդր Ազարյանի կայացրած որոշման հետ:
Ռշտունին հիշյալ հարցազրույցում նաև ասել էր՝ վերադաս դատական ատյան ունենք, վերադաս դատական ատյանը թող գնահատի՝ Ազարյանի դիրքորոշումը ճի՞շտ է, թե՞ ճիշտ չէ։
Նշենք, որ Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշում էր կայացրել Ռոբերտ Քոչարյանի նկատմամբ կիրառված խափանման միջոց կալանքը փոխարինել ազատությունից զրկելու հետ չկապված խափանման միջոցով` Արցախի գործող ու նախկին նախագահների անձնական երաշխավորությամբ։
Մայիսի 20–ին ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, Պաշտպանության նախկին նախարար Սեյրան Օհանյանի և ՀԱՊԿ նախկին գլխավոր քարտուղար Յուրի Խաչատուրովի վերաբերյալ գործի վարույթը դատարանի որոշմամբ կասեցվել է և ուղարկվել Սահմանադրական դատարան:
