ԵՐԵՎԱՆ, 3 հունիսի — Sputnik. 2016 թվականի ապրիլյան պատերազմի հանգամանքներն ուսումնասիրող Ազգային ժողովի քննիչ հանձնաժողովի ստեղծումը վտանգավոր է։ Այսօր լրագրողների հետ զրույցում նման կարծիք հայտնեց Հանրային խորհրդի նախագահ Վազգեն Մանուկյանը։
«Նախ և առաջ ես պետք է ասեմ, որ Ազգային ժողովին բանակի գործերին խառնվել չի կարելի։ Տեսնելով, թե ինչ էր կատարվում նախորդ ամիսներին, ես համոզված եմ, որ խառնվելու են մինչև վերջ»,– ասաց Մանուկյանը` հավելելով, որ դեմ է ապրիլյան պատերազմի խնդիրները խորհրդարանում քննարկելուն։
Ինչ վերաբերում է բանակին, Մանուկյանը չհերքեց, որ դրանում կոռուպցիա կա։ «Բայց կոռուպցիայի դեմ պայքարելով չի կարելի քանդել ինչ-որ բաներ»,– ասաց նա։
Որպես օրինակ Հանրային խորհրդի նախագահը հիշեցրեց ռուսական «Ավելորդը« ֆիլմի սյուժեն, որտեղ գլխավոր հերոսի պայքարն իր ընտանիքին պատկանող բիզնեսում առկա կոռուպցիայի դեմ հանգեցրեց ընկերության փակվելուն։
«Ես չեմ ցանկանա, որ Հայաստանը փակվի»,– ասաց Մանուկյանը։
Հիշեցնենք` մայիսի 31–ին Ազգային ժողովի նախագահ Արարատ Միրզոյանը հայտարարել էր 2016 թվականի ապրիլյան քառօրյա պատերազմի հանգամանքների ուսումնասիրության քննիչ հանձնաժողով ստեղծելու մասին:
Ազգային ժողովի կանոնակարգի համաձայն՝ քննիչ հանձնաժողովը պետք է ղեկավարի Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը:
Մայիսի 20-ին ՀՀ վարչապետ Նիկոլ Փաշինյանը դատաիրավական համակարգի վերաբերյալ ընդարձակ ելույթի ընթացքում նշել էր, որ հասունացել է 2016 թվականի ապրիլյան պատերազմի հանգամանքներն ուսումնասիրող Ազգային ժողովի քննիչ հանձնաժողով ստեղծելու և մեզ բոլորիս հուզող մի շարք հարցերի պատասխանները ստանալու ժամանակը:
