ԵՐԵՎԱՆ, 31 մայիսի — Sputnik. ՀՀ ազգային ժողովը պատրաստվում է երկրորդ և վերջնական ընթերցմամբ ընդունել ցեմենտի ներկրման մեկ տոննայի համար 14 հազար դրամ տուրք սահմանելու մասին օրինագիծը։
ՀՀ տնտեսական զարգացումների և ներդրումների նախարար Տիգրան Խաչատրյանն օրինագիծը ներկայացնելիս նշեց, որ «Պետտուրքի մասին» օրենքի փոփոխություններն ի սկզբանե ենթադրում էին, որ Հայաստանում աշխատանքը կարող էին շարունակել ցեմենտի բոլոր արտադրողները (ինչպես ներկրվող կլինկերից, այնպես էլ տեղական)։ Առաջին ընթերցմամբ քննարկումից հետո կառավարությունը ևս մեկ անգամ է ուսումնասիրել ցեմենտի տեղական արտադրողների ծախսերը։
«Տակը բան պիտի լինի, որ հնարավոր լինի». Ծառուկյանը` իրեն մանդատից զրկելու մասին
«Մենք հաշվարկեցինք, որ մեկ տոննա ցեմենտի ինքնարժեքը 7-8 դրամով պակաս է, քան նախնական հաշվարկներով։ Մենք եկանք նրան, որ տուրքը պետք է ոչ թե 22 հազար, այլ 14 հազար դրամ կազմի», – ասաց Խաչատրյանը։
Կլինկերը, նրա խոսքով, ինչպես նախկինում, չի հարկվելու, որպեսզի ներկրվող հումքով աշխատող ընկերությունները կարողանան շարունակել աշխատանքը։
Խաչատրյանն ընդգծեց, որ ոլորտի արտադրողներն ու աշխատակիցները սպասում են օրենքի ընդունմանը։
Օրենքն առաջարկվեց ընդունել առավելագույն սեղմ ժամկետներում, քանի որ առջևում շինարարական սեզոնն է։ Սակայն օրենքը կգործի մինչև 2020 թվականի ապրիլը։ Այդ ընթացքում նոր ուսումնասիրություններ կանցկացվեն, և դրանց արդյունքում կառավարությունը հանդես կգա նոր առաջարկով։
«Բարգավաճ Հայաստանի» պատգամավոր Արտյոմ Ծառուկյանն ի պատասխան հայտարարեց, ր ԲՀԿ–ն կողմ է քվեարկելու առաջարկած օրինագծին, բայց աշխատատեղերի հավանական կրճատման ռիսկերի հետ կապված ամբողջ պատասխանատվությունը մնալու է «Իմ քայլը» դաշինքի և կառավարության ուսերին։
«Լուսավոր Հայաստան» խմբակցության պատգամավոր Մանե Թանդիլյանը նույնպես մեղադրեց իշխանությանը «վատագույն սցենարն» ընտրելու համար։
Ապրիլի 19-ին ԱԺ–ն առաջին ընթերցմամբ հավանություն էր տվել «Պետական տուրքի մասին» ՀՀ օրենքում լրացում կատարելու մասին» և «Գործունեության իրականացման ծանուցման մասին» ՀՀ օրենքում լրացում կատարելու մասին» ՀՀ կառավարության առաջարկած նախագծին, որը ենթադրում էր բարձրացնել ներկրվող ցեմենտի տուրքը։ Օրինագծի նախնական տարբերակի համաձայն` ցեմենտի 1 տոննայի տուրքը պետք է կազմեր 22 հազար դրամ։ Սակայն այն ժամանակ, ինչպես նաև երկրորդ ընթերցմամբ ընդունված փոփոխությունները կլինկերի (հումքի) ներկրմանը չէին առնչվում։
Ավելի վաղ ԲՀԿ-ն, որի առաջնորդ Գագիկ Ծառուկյանն «Արարատցեմենտ» ՓԲԸ–ի սեփականատերն է, առաջարկում էր պետտուրք սահմանել ոչ միայն ներկրվող ցեմենտի, այլ նաև կլինկերի համար։ ԲՀԿ–ի պատգամավորները պնդում էին, որ այլապես «Արարատցեմենտը» ստիպված կլինի էապես կրճատել աշխատողների թիվը։
