ԵՐԵՎԱՆ, 31 մայիսի – Sputnik. «Բարգավաճ Հայաստան» կուսակցության նախագահ Գագիկ Ծառուկյանն այսօր ԱԺ–ում անդրադարձավ լրագրողական կազմակերպությունների հայտարարությանը, որով պաշտոնյաներին, այդ թվում՝ Ծառուկյանին, կոչ է արվում զսպվածություն ցուցաբերել լրագրողների հանդեպ։
«Էդ կոչ անողներն առաջինը թող իրենք իրենց լրագրողներին կարգի հրավիրեն, որ կարողանա լրագրողը հարգարժան մարդուն հարցը տալուց… Ոչ թե ես խուսափում եմ հարցերից, բայց լրագրողը պետք է հասկանա։ Ես դեռ իմ վրա զարմանում եմ, թե ոնց այդքան կոռեկտ ես պատասխանեցի։ Ինձ անհիմն վիրավորեց, որի համար պիտի պատասխան տա»,- ասաց նա։
Ծառուկյանը նշեց, որ իրեն միշտ նույն հարցերն են տալիս, փոխարենը հարցնեն սպորտից, տնտեսությունից։
«Երբ գալիս եմ, 5 հարց եք տալիս` Քոչարյանից, Սերժից, Մարտի 1-ից։ Երկրում հեղափոխություն է եղել, մարդիկ սպասելիքներ ունեն, դուք նույն հարցերն եք տալիս»,– ասաց նա։
Նա ընդգծեց, որ ուզում է ազգին պիտանի լինել։
Օրեր առաջ ԱԺ–ում Ծառուկյանը դժգոհել էր լրագրողների հարցերից՝ հայտարարելով, որ նրանք իրեն անհաճո հարցեր տալու համար գումար են վերցնում ու պատվեր կատարում:
