ԵՐԵՎԱՆ, 30 մայիսի — Sputnik. Մայիսի 29-ի գիշերը՝ ժամը 03։30-ի սահմաններում, Սևան- Մարտունի ավտոճանապարհին հետապնդման են ենթարկվել ԼՂՀ պաշտպանության բանակի նախկին հրամանատար, գեներալ-լեյտենանտ Սամվել Բաբայանի համակիրները։ Այս մասին այսօր ահազանգել է Սամվել Բաբայանի գրասենյակը։
«Արցախցիներին հայտնի բանդայի կողմից հետապնդվել են Սամվել Բաբայանի համակիրները, զինակից ընկերները, որոնք Սամվել Բաբայանի հետ մարտական ուղի են անցել և վերջինիս հետ ծառայել զինվորական կառույցներում , այսօր էլ ակտիվորեն մասնակցում են նրա հանդիպումներին։ Նրանց ճանապարհը փակել են և հրազենից կրակահերթ ուղղել նրանց ուղղությամբ։ Այդ ճանապարհահատվածի բոլոր հնարավոր տեսախցիկներն ու արագաչափերը ֆիքսել են «բանդայի» մրցավազքը»,– ասված էր հայտարարության մեջ։
Ահազանգողները նաև հայտնում են, որ իրենց տեղեկություններով, դա եղել են «Քարվաճառի և Մարտակերտի հրոսակախմբերը, որոնց պարագլուխներն են Բալայան Ալեքսեյ, Այդինյան Ռոլանդ, Միրզոյան Գրիգորի անուններով արցախցիների մեջ քաջ հայտնի երիտասարդները»։
Նշվում է նաև, որ կրակողներից մեկը եղել է սպիտակ «Տոյոտա Քեմրի» ավտոմեքենայով, որը պատկանում է Ալեքսեյ Բալայանին։
«Այս բանդաները իրենց պարագլուխներով ծառայում են ԱՀ նախկին վարչապետ, իսկ հիմա ԱՀ նախագահի թեկնածու , «Ազատ Հայրենիք» կուսակցության նախագահ Արայիկ Հարությունյանին»,– նշված է հայտարարության մեջ։
Բաբայանի գրասենյակը կոչ է անում ՀՀ ԱԱԾ-ին ու իրավապահ այլ կառույցներին` հետամուտ լինել միջադեպի բացահայտմանն ու մեղավորներին պատժելուն։
«Իսկ եթե իրավապահ մարմինները հետամուտ չլինեն այս ամենի բացահայտմանը, ապա մենք ստիպված կլինենք կիրառել նույն մեթոդները և պատասխան հասցնել նույն ոճով, որովհետև այլ ելք չի մնում»,– նշում է Սամվել Բաբայանի գրասենյակը։
Տեղի ունեցած միջադեպի վերաբերյալ մինչ Բաբայանի գրասենյակի հայտարարությունը ՀՀ ոստիկանությունը, պարզվում է, արդեն տեղյակ է եղել։ Այս մասին իր ֆեյսբուքյան էջում հայտնել է ՀՀ ոստիկանության տեղեկատվության և հասարակայնության հետ կապի վարչության պետ Էդգար Ջանոյանը։
«Տեղեկացնենք, որ նախքան այդ հայտարարությունը ոստիկանությունն արդեն իսկ օպերատիվ տվյալներ ուներ և ոստիկանության պետի հանձնարարությամբ ձեռնարկվել և այս պահին էլ ձեռնարկում են անհրաժեշտ օպերատիվ-հետախուզական միջոցառումներ միջադեպի բոլոր մասնակիցների ինքնությունը, նրանց գտնվելու վայրը ճշտելու, ինչպես և կատարվածի բոլոր հանգամանքները պարզելու ուղղությամբ»,– նշում է Ջանոյանը։
Ոստիկանությունը շարունակում է միջոցառումներ իրականացնել։ Կատարվում է քննություն։
