ԵՐԵՎԱՆ, 29 մայիսի — Sputnik. «Վարդանյան ընտանիք» բարեգործական հիմնադրամն ապամոնտաժել է երևանյան նոր այգում տեղադրված նավակով տղայի արձանը`այն վերականգնելու համար. մայիսի 31–ի առավոտյան արձանն արդեն իր տեղում կլինի։ Այս մասին Sputnik Արմենիայի հարցմանն ի պատասխան հայտնեց «Վարդանյան ընտանիք» բարեգործական հիմնադրամի տնօրեն Արամ Ղազարյանը։
Առավոտից Facebook–ի օգտատերերը տարածում են մի լուսանկար, որտեղ երևում է արձանը`վնասված ձեռքով։ Նավակով տղայի ձեռքը կոտրված է։ Մարդիկ վրդովված էին պատահածի առիթով։
«Երեկ երեկոյան, երբ այգին մարդաշատ էր, մի երիտասարդ տղա` այգում վազելիս, ոտքի ուժեղ հարվածով պատահաբար խփել է նավակով տղայի արձանի ձեռքին, ինչի պատճառով արձանի ձեռքը՝ երկաթի զոդման հատվածից պոկվել է», – ասել է Ղազարյանը։
Արձանը բրոնզաձույլ է և պատրաստված է բրոնզաձույլ արձանների պատրաստման դասական տեխնոլոգիայով՝ կվարցե ավազի օգտագործմամբ:
Միաժամանակ հիմնադրամի տնօրենը նշում է, որ ռեստավրացիայի ընթացքում զոդումն իրականացվելու է ավելի ուժեղ ամրացմամբ, որպեսզի հետագայում անգամ շատ ուժեղ հարվածների դեպքում խնդիրը չկրկնվի:
«Ամեն դեպքում կոչ ենք անում, որպեսզի այգու այցելուները երեխաների արձանների վրա չբարձրացնեն. արձանները նախատեսված չեն ոչ հարվածներ ընդունելու և ոչ էլ մարդկային ծանր քաշին դիմանալու համար», – նշված է հարցման պատասխանի մեջ։
Հիմնադրամի ներկայացուցիչները խնդրում են խոտածածկը չտրորել: Դրանց վրայով քայլելու դեպքում, վնասվում է ոչ միայն խոտածածկն, այլ նաև այդ հատվածների ավտոմատ ոռոգման համակարգը:
«Վարդանյան ընտանիք» բարեգործական հիմնադրամի և ՀՀ ոստիկանության միջև կնքվել է պայմանագիր, ըստ որի այգու շուրջօրյա պահպանությունն իրականացվում է մի քանի ոստիկանների կողմից:
«Ցանկանում ենք նաև շնորհակալություն հայտնել՝ Երևանի 2800-ամյակի այգու այցելուների հնչեցրած հազարավոր բարձր գնահատականների, դրական արձագանքների և բարի խոսքերի համար», – ասված է Sputnik Արմենիային ուղարկած պատասխանում։
Քանդակագործ Լևոն Թոքմաջյանն իր հերթին Sputnik Արմենիայի թղթակցի հետ զրույցում նշեց, որ քանդակն իսկապես չէր կարող դիմակայել ծանրությանը կամ հարվածին։
«Տղայի ձեռքն օդում է, այդ պատճառով լրիվ ռեալ է, որ այն չի դիմանալ, հնարավոր է` այդ հատվածը լավ զոդված չի եղել», – ասաց Թոքմաջյանը։
Քաղաքապետարանի մամուլի քարտուղար Հակոբ Կարապետյանը Sputnik Արմենիայի թղթակցի հետ զրույցում ասաց, որ Երևանի քաղաքապետարանը ցավում է տեղի ունեցածի համար, սակայն ամբողջ պատասխանատվությունը հիմնադրամն է կրում, քաղաքային իշխանությունի չի կարող վերահսկել այն ամենը, ինչ տեղի է ունենում։
Նա որպես օրինակ բերեց Կարապի լճի մոտ տեղադրված Առնո բաբաջանյանի արձանը։
«Արձանը մշտապես «շփման» մեջ է մարդկանց հետ. դրա վրա նստում են, լուսանկարվում են, երեխաները մագլցում են վրան։ Հնարավոր է` այստեղ երևում է արված աշխատանքի բարձր որակը», – ասաց Կարապետյանը։
Հիշեցնենք` Երևանի 2800–ամյակին նվիրված այգու հանդիսավոր բացումը կայացել է մայիսի 10-ին։ Բացման մասնակցել են ՀՀ վարչապետ Նիկոլ Փաշինյանն ու Երևանի քաղաքապետ Հայկ Մարությանը։
Նշենք, որ այգին վերանորոգվել և ամբողջությամբ վերակառուցվել է Վարդանյան ընտանիքի ֆինանսավորմամբ։ Աշխատանքների վրա ծախսվել է 5,3 միլիոն դոլար։
Այգում տեղադրված է 2800 շատրվան, 7 բրոնզե հուշարձան։ Այն զարդարված է հին հայկական գորգերի նախշերով և 70 տեսակի 250 ծառերով։ Վարդանյանների ընտանիքը 99 տարի հոգալու է այգու վերանորոգման աշխատանքների և խնամքի հետ կապված բոլոր ծախսերը։
