ԵՐԵՎԱՆ, 29 մայիսի — Sputnik. Կրթության փորձագետ Սերոբ Խաչատրյանի համոզմամբ` 9–րդ դասարանցիների «Հայոց լեզու» առարկայի կենտրոնացված քննությունից աշակերտների առնվազն 30 տոկոսն անբավարար կստանար, եթե կրկնուսույցի մոտ չպարապեր։ Խաչատրյանն այս կարծիքը հայտնեց այսօր լրագրողների հետ հանդիպման ժամանակ։
«Կենտրոնացված քննություն անցկացնելը բերեց միայն նրան, որ որոշ աշակերտներ սկսեցին դրա համար մասնավոր պարապել։ Չեմ կարծում` կենտրոնացված քննություն անցկացնելով մենք աշակերտների գիտելիքի իրական պատկերը կունենանք։ Համոզված եմ, որ մեծ թվով աշակերտներ ուղղակի անբավարար կստանան, քանի որ այնպես չէ, որ բոլորը պարապել են»,–ասաց նա։
Նրա խոսքով` կենտրոնացված քննության միջոցով աշակերտների գիտելիքի իրական պատկերը չենք տեսնի, քանի որ աշակերտների մի մասը կրկնուսույցի մոտ է պարապել։ Բացի այդ, ըստ կրթության փորձագետի, կենտրոնացված քննության ընթացքում աշակերտները կարողանում են իրար օգնել, մանավանդ եթե իրար մրցակից չեն։
«Կա նաև մեկ այլ գործոն` ուսուցիչները կարող են աչք փակել աշակերտների` իրար օգնելու վրա։ Տեսեք` մի ուսուցիչ գնում է կողքի դպրոց, իսկ կողքի դպրոցի ուսուցիչը գալիս է այդ դպրոց, ու երկուսն էլ կուզեն, որ իրենց դպրոցի աշակերտների ցուցանիշները բարձր լինեն»,–ասաց նա։
Հիշեցնենք, որ մայիսի 26–ին հանրակրթական ուսումնական հաստատություններում սովորող 9-րդ դասարանցիները հայոց լեզու առարկայից կենտրոնացված քննություն հանձնեցին։ Գնահատման և թեստավորման կենտրոնի մամուլի խոսնակ Խաչանուշ Գրիգորյանը Sputnik Արմենիայի հետ զրույցում նշեց, որ «Հայոց լեզվի» կենտրոնացված քննության նախնական արդյունքները կհրապարակվեն հունիսի 2–ին։ Իսկ հունիսի 10–ին հայտնի կլինի քննության վերջնական պատկերը` բողոքարկման արդյունքներն ամփոփելուց հետո։
