Այ քեզ բան. ռոբոտն ու մարդը «կոլեգա» կդառնան, իսկ ռոբոտ շունը ինքնաթիռ քարշ կտա. տեսանյութ

ԵՐԵՎԱՆ, 25 մայիսի – Sputnik, Գոռ Մարգարյան. Այս շաբաթվա ընթացքում հետաքրքիր առաջխաղացում է տեղի ունեցել ռոբոտատեխնիկայի ոլորտում, Facebook-ի արժեքն ընկել է, իսկ նոր սարքը խորհուրդներ է տալու, թե ում հետ կարելի է շփվել:

Հիմա ամեն ինչի մասին՝ հերթով:

Ռոբոտ-կոլեգա

Արդյունաբերական ռոբոտները հիանալի են կատարում իրենց առաջադրանքները, եթե նրանց տրվում են հստակ հրահանգներ: Այնուամենայնիվ, Մասաչուսեթսի ինստիտուտի հետազոտողները կարծում են, որ ռոբոտներն ավելի լավը կդառնան, եթե ճանաչեն մարդկանց շարժումները: Այս միտքը փորձարկելու համար նրանք ստեղծել են հատուկ ռոբոտացված ձեռք, որն աշխատանքը կատարում է՝ հետևելով իր մարդ–կոլեգայի շարժումներին: Այս ձեռքբերումը լուրջ առաջխաղացում է համարվում ռոբոտաշինության մեջ: Այս մասին հայտնում է engadget-ը:

Այ քեզ բան. Google-ը կխոսի մեր ձայնով, աստղը սատկել է, իսկ ոմանք դեմ են դեմքի ճանաչմանը

Համակարգը ստացել է RoboRaise անվանումը և տեղադրվել է արդեն գոյություն ունեցող Baxter ռոբոտի մեջ: Դրա լիարժեք աշխատանքի համար անհրաժեշտ են եղել ընկալող-հաղորդող սարքեր, որոնք ամրացվում են մարդ– կոլեգայի ձեռքին և հաշվում մկանների հաղորդած էլեկտրական ազդանշանները: Այդ տվյալները հրամանների ձևով ուղարկվում են RoboRaise-ին, և ռոբոտը մի քանի սանտիմետրի ճշգրտությամբ կրկնում է մարդու շարժումները:

Համակարգը ստեղծողները, բնականաբար, այսքանով չեն սահմանափակվելու և մտադիր են ապագայում մարդկային ձեռքի վրա ավելի շատ ընկալող-հաղորդող սարքեր ամրացնել, որպեսզի դրանք կարողանան գնահատել մարդու հոգնածության մակարդակը և անհրաժեշտության դեպքում ռոբոտին ուժը մեծացնելու հրաման տալ, որպեսզի կանխեն մարդ–կոլեգայի գերհոգնածությունը:

Հույզերը կառավարող սարք Amazon-ից

Amazon ընկերությունը սկսել է զբաղվել շարժական սարքի մշակմամբ, որն ունենալու է ձայնային օգնական և ճանաչելու է մարդու հույզերը։

Այ քեզ բան․ ծալվող սմարթֆոնը շտկվել է, պայուսակը` զինվել էկրանով, Դալին էլ` վերակենդանացել

Bloomberg գործակալության ձեռքի տակ են հայտնվել կորպորացիայի ներքին փաստաթղթերը, որոնք պատմում են «առողջության համար նախատեսված ձեռքի գաջեթի» նախագծի մասին: Այդ սարքը, որը համալրված է միկրոֆոնով, տիրոջ ձայնը «լսելով» կարողանում է որոշել նրա հուզական վիճակն ու խորհուրդ տալ, թե ինչպես ավելի արդյունավետ կլինի շփվել մարդկանց հետ: Սարքն աշխատելու է սմարթֆոնների համար նախատեսված հավելվածի հետ:

Այս պահին անցկացվում է սարքի թեստավորումը: Դեռևս 2017 թվականին Amazon-ը գրանցել էր համակարգի նախատիպ, որն ընդունակ է հետազոտել մարդկային ձայնի նմուշները և որոշել տիրոջ էմոցիոնալ վիճակը: Bloomberg-ը վստահ է, որ հենց այս համակարգն է օգտագործվել սարքը նախագծելիս:

Մեխանիկական շուն

Ռոբոտատեխնիկայի և ավտոմատացման Միջազգային համաժողովի ժամանակ ներկայացվել է ռոբոտ-շուն: Նրա երկարությունը 120 սանտիմետր է, իսկ քաշը ՝130 կգ, որից 15 կգ-ը մարտկոցինն է(ծանր մարտկոցի շնորհիվ ռոբոտը կարող է աշխատել երկու ժամ):

Մեխանիկական շունը մոտավորապես 10 մետր քարշ է տվել 3 տոննա կշռող Piaggio P180 Avanti ինքնաթիռը: Ինչպես նշում է Daily Mail-ը, ռոբոտը ստեղծել են Իտալիայի տեխնոլոգիայի ինստիտուտի ինժեներները: Այն նախատեսվում է գործածել արտակարգ իրավիճակներում՝ աղետների ժամանակ, սակայն կարող է օգտակար լինել նաև հետախուզության ու գյուղատնտեսության ոլորտներում:

Այ քեզ բան. դրոնն օրգան է առաքել, Մարսում շոու է լինելու, իսկ ինչ անի ականջակալ կուլ տվողը

«Ինքնաթիռը քարշ տալու փորձի միջոցով մենք ցույց տվեցինք ռոբոտի ուժը, այն կարող է համապատասխան իրավիճակում նաև մարդկանց տեղափոխել: Մենք ցանկանում էինք անել մի բան, որը երբևէ չի արվել, և անցած շաբաթ դա մեզ հաջողվեց»,- ասել է Իտալիայի տեխնոլոգիայի ինստիտուտի լաբորատորիայի ծրագրային ղեկավար Կլաուսիո Սեմինին:

Forbes–ի ամենամյա վարկանիշի առաջին հորիզոնականներում տեխնոապրանքանիշներն են

Ինչպես հայտնի է բոլորին, Forbes ամսագիրն ամեն տարի հրապարակում է աշխարհի ամենաթանկարժեք ապրանքանիշների վարկանիշային աղյուսակը: Այս տարվա ցանկն առանձնապես չի տարբերվում նախորդից: Ամերիկյան Apple–ն արդեն 9-րդ տարին անընդմեջ գլխավոր դերում է, որովհետև ընկերության շուկայական արժեքը գնահատվում է 205,5 մլրդ դոլար, ինչը 12 %-ով շատ է անցյալ տարվա ցուցանիշից: Հատկանշական է, որ հաջորդ չորս տեղերում կրկին տեխնոապրանքանիշներն են։ Թանկարժեքության մակարդակով Apple-ին է մոտենում Google-ը: Այս ապրանքանիշը գնահատվում է 167,7 մլրդ դոլար, ինչը 27 %-ով շատ է անցյալ տարվա արդյունքից:

3-րդ հորիզոնականում Microsoft–ն է, իսկ 4-րդում` Amazon-ը, որը նախորդ տարվա համեմատ իր դիրքը բարելավել է մեկ հորիզոնականով։ Միայն Facebook–ն է զիջել իր դիրքը` 4-րդից հասնելով 5-րդին:

Տեղեկատվական տեխնոլոգիաների և նորարարությունների ոլորտում շաբաթվա ընթացքում այլ իրադարձություններ էլ են տեղի ունեցել, որոնց մասին մենք արդեն գրել ենք, այնպես որ խորհուրդ կտամ կարդալ ևս մի քանի լուր, որոնք չեն վրիպել մեր աչքից։

«Գահերի խաղը» սերիալի ոճով թանկարժեք սմարթֆոն է ներկայացվել

Google-ը կփոխի իր որոնման դաշտի դիզայնը

Sony-ն ցույց տվեց`ինչպես է իր PlayStation 5-ը ջախջախում PS4 Pro-ին

Huawei-ը 90 օր ժամանակ ունի սկանդալային իրավիճակից դուրս գալու համար