ԵՐԵՎԱՆ, 24 մայիսի – Sputnik. Կ. Ստանիսլավսկու անվան ռուսական դրամատիկական թատրոնում այս դարում առաջին անգամ կբեմադրվի անգլիացի բանաստեղծ ու դրամատուրգ Վիլյամ Շեքսպիրի անմահ «Ռոմեո և Ջուլիետն» պիեսը։ Այս մասին այսօր մամուլի ասուլիսի ընթացքում ասաց թատրոնի գեղարվեստական ղեկավար Կարեն Ներսիսյաննը։
«Պրեմիերան կկայանա վաղը` մայիսի 25–ին։ 21-րդ դարում պիեսն առաջին անգամ է բեմադրվում այս թատրոնի բեմում։ Մի 40 տարի առաջ Գրիգորյանը (թատրոնի նախկին ղեկավար Ալեքսանդր Գրիգորյանը) բեմադրել էր Շեքսպիրի «Մակբեթը», որտեղ դեռ Արմեն Ջիգարխանյանն էր խաղում», – ասաց Ներսիսյանը։
Ներսիսյանի համար սա առաջին ներկայացում է Ստանիսլավսկու թատրոնում, ու նա ուզում էր առանձնահատուկ պիեսից սկսել, նաև ստուգել թատերախմբի հնարավորությունները։ «Ռոմեո և Ջուլիետի» ընտրության հարցում որոշիչ գործոն էր ծանոթությունը դերասանուհի Հռիփսիմե Նահապետյանի հետ։ Իսկ Ռոմեոյի դերը կկատարի Արեն Խաչատրյանը։
Ռեժիսորին գրավել էր Նահապետյանի «ներքին լույսը, խառնվածքն ու հմայքը»։ Դեկտեմբերի սկզբից սկսել են աշխատել պիեսի վրա, սակայն փորձերը մեծ դադարներով էին անում, քանի որ Ներսիսյանը պարբերաբար մեկնում էր այլ բեմադրություններ անելու։ Բայց նրա խոսքով` բաց թողնվածն արագ լրացրեցին։
Ռեժիսորը վստահ է` ողբերգական սիրո մասին պատմող Շեքսպիրի պիեսը տարբեր համատեքստերում է հետաքրքիր։ Ու ընդհանարպես, Շեքսպիրն օգտակար է առողջության համար` ռեժիսորի, հանդիսատեսի, դերասանների, քանի որ Ներսիսյանի պնդմամբ, այն օգնում է պահպանել մշտական ներքին երջանկության զգացողությունը։
Ներսիսյանը պատմեց նաև, որ մինչ նոր տարի հանդիսատեսին առնվազն չորս ներկայացում է սպասվում։ Ռոմեո և Ջուլիետից հետո թատրոնի բեմում միանգամից երեք նոր ներկայացում կբեմադրվի։
«Շատ են զանգում Ռուսաստանից, Մակեդոնիայից, ուզում են աշխատել մեզ հետ։ Քաջ Նազարի համար ռուս նկարչի եմ հրավիրել։Ոչ թե այն պատճառով, որ մեր նկարիչները վատն են, պարզապես, թատրոնին անընդհատ նոր շունչ է պետք», –ասաց Ներսիսյանը։
«Ռոմեո և Ջուլիետ» ներկայցումը ապագայում հնարավոր է մասնակցի երեք փառատոնի, որոնք կկայանան Ռյազանում, Սարանսկում ու Սանկտ Պետերբուրգում։
Թատրոնի տնօրինի ժ.պ. Յուրի Իգիթխանյանը շտապեց ուրախացնել երևանյան հանդիսատեսին` ասելով, որ ամեն ամիս նոր ներկայացում է լինելու։
«Վերջապես թատրոնում լավ աշխատանքային մթնոլորտ է տիրում։ Այն շրջանը, երբ հնարավոր էր տոմսեր գնել ներկայացումից առաջ, անցյալում է։ Օրինակ` վաղվա պրեմիերայի բոլոր տոմսերն արդեն վաճառված են, մայիսի 26–ի ներկայացման տոմսեր էլ գրեթե չեն մնացել։ Տոմսերը կարելի է գնել առցանց` մեր կայքից», – լրագրողների հետ զրույցում ասաց Իգիթխանյանը։
Նա ընդգծեց, որ թատրոնի գեղարվեստական ղեկավարի հետ համագործակցելով է աշխատում, ինչպես և պետք է լինի։ Իգիթխանյանն ասաց նաև, որ ոմանք անանուն նամակներ են գրում իրենց գործունեության հետ կապված, և այժմ իրավապահ մարմինները զբաղվում են դրանով։
Հիշեցնենք` Կարեն Ներսիսյանը թատրոնի գեղարվեստական ղեկավար է նշանակվել հոկտեմբերի 16–ին, իսկ Յուրի Իգիթխանյանը` տնօրենի ժ.պ.–ի պաշտոնը հունվարի 10–ից։
