ԵՐԵՎԱՆ, 25 Մարտ — Sputnik. Եթե Մնջախաղի թատրոնը դուրս գա պետական հոգածությունից, ապա այդ նույն օրը թատրոնը կփակվի։ Այսօր լրագրողների հետ զրույցում այս մասին ասաց Մնջախաղի պետական թատրոնի տնօրեն Ժիրայր Դադասյանը։ Նրա խոսքով` մշակութային ոլորտում ՊՈԱԿ–ների մասնավորեցման, վերամիավորման գործընթացը հիմնավորված չէ։
«Ես չգիտեմ մի թատրոն, որն ինքնաֆինանսավորմամբ կարողանում է գոյատևել։ Մասնավորեցմանը գնալը, կարծում եմ, չհիմնավորված որոշում է»,–ասաց Դադասյանը։
Թատրոնի տնօրենը վստահ է` պետական թատրոնների հանդեպ տարբերակված վերաբերմունք պետք է լինի։ «Պետական թատրոնը պատահական չէ, որ կոչվում է պետական, չէ՞։ Լավ է, որ այժմ մշակույթի նախարարությունը մրցութային կարգով է դարձրել ներկայացումների ֆինանսավորման համակարգը, սակայն պետք է պետական թատրոնների հանդեպ վերաբերմունքը մի փոքր այլ լինի։ Կարծում եմ` մշակութային քաղաքականության մեջ հստակություն չի ուրվագծվում»,– ասաց Դադասյանը։
Նրա խոսքով` Հայաստանում պետական թատրոնների թիվը շատ ավելի քիչ է, քան կարող էր լինել. պետական թատրոնների թիվը 3 անգամ քիչ է։ Մյուս կողմից, ըստ Դադասյանի, դրամաշնորհ միայն պետությունը չէ, որ պետք է տրամադրի։
Նա տեղեկացրեց նաև, որ իրենք երկու հայտով դիմել են մշակույթի նախարարություն և ֆինանսավորում ստացել` մեկ նոր ներկայացման և այս տարի Լեոնիդ Ենգիբարյանի անվան փառատոնն անցկացնելու համար։ Դադասյանի խոսքով` ներկայացման համար իրենց տրամադրվել է 6 մլն 700 հազար դրամ, իսկ փառատոնի համար` 16 մլն դրամ։
«Սակայն փառատոնի համար տրամադրված գումարն արդյունքում 13 մլն է լինում, քանի որ դրա 20 տոկոսը պետք է ԱԱՀ վճարենք, ինչը նախկինում չկար։ Ներկայացման գումարը լիարժեք կբավարարի այն կյանքի կոչելու համար, սակայն փառատոնի գումարը քիչ է»,–ասաց Դադասյանը` հավելելով, որ հովանավորի կարիք էլ կլինի։
Խոսելով նոր բեմադրվելիք ներկայացման մասին` թատրոնի տնօրենը տեղեկացրեց, որ ներկայացման գլխավոր հերոսն ակտիվիստ է։
«Պիեռոյի երազը» ներկայացման մտահղացումը, ըստ Դադասյանի, ծնվել է էլեկտրաէներգիայի թանկացման դեմ պայքարի օրերին։ Ներկայացման երաժշտությունն Արամոն է գրելու։
Ի դեպ, Մարտի 27–ին Թատրոնի միջազգային օրն է, և այդ օրն ավանդաբար անցկացվում է «Արտավազս» թատերական մրցանակաբաշխությունը։ Դադասյանը նշեց, որ իրենց թատրոնը որևէ ներկայացման հայտ չի ներկայացրել, քանի որ ինքը փառատոնի ժյուրիի անդամ է։ Նրա խոսքով` նախորդ տարի ավելի հետաքրքիր ներկայացումներ կային, քան` այս տարի։ Սա, Դադասյանի կարծիքով, գուցե հետևանք է 2018–ի իրադարձությունների, և մարդիկ ուղղակի չեն հասցրել ներկայացումներով զբաղվել։
Հիշեցնենք` փետրվարին ԶԼՄ–ները հրապարակել էին մի փաստաթուղթ, ըստ որի` նախարարությունն առաջարկում է Սոս Սարգսյանի անվան համազգային պետական թատրոնը, Հայաստանի երգի պետական թատրոնը, Երևանի կամերային պետական թատրոնը, Երևանի կամերային երաժշտական թատրոնը, Հայաստանի պետական ֆիլհարմոնիան, Կոմիտասի անվան ազգային քառյակը և ՊՈԱԿ-ի կարգավիճակ ունեցող 15 այլ կազմակերպություններ լուծարել, վերակազմավորել կամ/և վերակազմակերպել:
ՀՀ մշակույթի նախարարի պաշտոնակատար Նազենի Ղարիբյանն ասուլիս էր հրավիրել և նշել, որ դա ընդամենը սևագիր տեղեկանք է, եղել է որոշակի վերլուծություն կատարելու կառավարական հանձնարարական, իսկ նման հանձնարարականներ ստանում են բոլոր նախարարությունները։ Ըստ Ղարիբյանի` Հայաստանի մշակույթի նախարարությունը չի պատրաստվում միավորել կամ փակել այն ՊՈԱԿ–ները, որոնք հիշատակվում են ԶԼՄ–ներում հայտնված տեղեկանքում։
