«Շուտով կազատվեմ պաշտոնից, որը զբաղեցնելն ինձ համար մեծ պատիվ էր։ Ինձ բախտ է վիճակվել լիներ երկրորդ, բայց հաստատ ոչ վերջին կին վարչապետը։ Ես սա անում եմ առանց չարության և անչափ երախտագիտությամբ, որ հնարավորություն ունեցա ծառել մի երկրի, որը սիրում եմ», –ասել է Մեյը։
Բրիտանիայի կառավարության ղեկավարը խոսքի վերջում սկսում է կմկմալ ու, արցունքները հազիվ զսպելով, մտնում է Դաունինգ սթրիթ 10 հասցեում գտնվող իր նստավայր։
Հիշեցնենք` Մեյը հայտարարել է, որ հունիսի 7-ին հրաժարական է տալու: Նրան ստիպել են համապատասխան հայտարարություն անել կուսակիցները, ներառյալ նախարարների կաբինետի անդամները, որոնք դժգոհ են Brexit–ի հարցով Եվրամիության հետ Մեյի ներկայացրած նորացված համաձայնագրից։
Նշենք, որ երկրորդ հանրաքվե անցկացնելու կողմնակիցները պահանջում են ժողովրդական քվեարկության դնել Brexit–ի վերաբերյալ ցանկացած պայմանավորվածություն։
Եթե Մեյի առաջարկած համաձայնագիրը հաստատվի հունիսի սկզբին, ապա Բրիտանիան կարող է դուրս գալ ԵՄ–ից մինչև խորհրդարանի ամառային արձակուրդը։ Եթե համաձայնագիրը կրկին տապալվի, Բրիտանիան պետք է լքի Եվրամիությունը հոկտեմբերի 31–ից ոչ ուշ։
Մեյը Մեծ Բրիտանիայի երկրորդ կին վարչապետն է Մարգարետ Թետչերից հետո։
