ԵՐԵՎԱՆ, 23 մայիսի — Sputnik. Հարազատ հոր` Միխայիլ Խաչատուրյանի սպանության մեջ մեղադրվող Խաչատուրյան քույրերը հրաժարվել են ժառանգությունից։ Այս մասին հայտնում է «360» հեռուստաալիքը` հղում անելով կրտսեր քրոջ փաստաբան Յարոսլավ Պակուլինին։
Միխայիլ Խաչատուրյանի աղմկահարույց սպանությունը տեղի էր ունեցել Մոսկվայում 2018 թվականի հուլիսի 27-ին։ 57-ամյա տղամարդու դիակը` վզի և կրծքավանդակի բազմաթիվ կտրած–ծակած վերքերով, հայտնաբերվել էր Մոսկվայի Ալտուֆևսկի մայրուղում գտնվող տան շքամուտքում։ Երեք դուստրերը խոստովանել են, որ իրենք են սպանել հորը։
«Բոլոր քույրերը հրաժարվել են ընդունել ժառանգությունը։ Նրանք ո՛չ բնակարանի, ո՛չ որևէ նյութական բարիքների կամ ֆինանսական աղբյուրների հավակնություն չունեն», – ասել է Պակուլինը։
Փաստաբանի կարծիքով` հոր ժառանգությունից հրաժարվելը վկայում է, որ քույրերը սպանությունը կատարել են ոչ շահադիտական նկատառումներով։
Պաշտպանը նշել է, որ աղջիկներից ոչ մեկը չի ցանկանում որևէ առնչություն ունենալ հոր անցյալի հետ։
Բացի այդ, Պակուլինը հայտնել է, որ հանգուցյալ Խաչատուրյանին մեղավոր ճանաչելու միջնորդություն է ներկայացնելու։ Նրա կարծիքով` «ծեծ» հոդվածն ամենամեղմն է, որը կարելի էր կիրառել աղջիկների հոր նկատմամբ։
Հիշեցնենք` Մոսկվայի Օստանկինյան դատարանը օգոստոսի 2-ին կալանավորել էր երեք քույրերին։ Սեպտեմբեր 27-ին Մոսկվայի Բասմանյան դատարանը հավանություն է տվել Խաչատուրյան քույրերի կալանքը «որոշակի գործողությունների արգելքով» փոխարինելու միջնորդությանը։ Նրանք տեղավորվել են առանձին բնակարաններում։ Այժմ մեղադրյալներին արգելվում է գիշերային ժամերին լքել բնակության վայրը և որևէ մեկի հետ շփվել առանց Պատժի կատարման դաշնային ծառայությանը տեղեկացնելու։
Բացի Պատժի կատարման դաշնային ծառայության աշխատակիցներից և աղջիկների պաշտպաններից, մյուսների հետ աղջիկները կշփվեն միայն քննիչի թույլտվությամբ։ Բացառություն է արվել Մարիայի համար, նրան թույլ են տվել շփվել մոր հետ, քանի որ մայրը նրա օրինական ներկայացուցիչն է։
