ԵՐԵՎԱՆ, 22 մայիսի — Sputnik. Երևանի կինոյի և թատրոնի ինստիտուտի ուսանողները պատրաստ են նստացույց անել։ Այս մասին քիչ առաջ հայտարարեցին նրանք` բոյկոտելով ինստիտուտի ռեկտորի ընտրությունը։
Ինչպես արդեն տեղեկացրել էինք, 14 կողմ, 9-ը դեմ և 1 անվավեր ձայների հարաբերակցությամբ այսօր բուհի ռեկտոր ընտրվեց միակ թեկնածուն` ռեկտորի ԺՊ Լիլիթ Արզումանյանը։ Դրանից հետո ուսանողները բողոքի ակցիա կազմակերպեցին` փակելով բուհի մուտքն ու ելքը։
«Պահանջում ենք, որ կրթության և գիտության նախարարը գա բուհ, թե չէ դռներն այդպես էլ փակ են մնալու։ Պահանջում ենք չեղարկել այս ընտրություն, նոր ընտրություն լինի ու էլի մարդիկ առաջադրեն իրենց թեկնածությունը և ընտրելու հնարավորություն լինի։ Հակառակ դեպքում` մենք այստեղ ենք մնալու»,– ասում են բուհի ուսանողները։
Նշենք, որ տեղում են նաև ոստիկանները, որոնց, սակայն, ներս մտնել չի հաջողվել։
Բուհի նորընտիր ռեկտոր Լիլիթ Արզումանյանն էլ հայտնեց, որ ինքը նախարարի «մարդը» չէ և երեկ կրկին գնացել է նախարարի մոտ` զրույցի։ Նախարարին ասել է, թե ինչ իրավիճակ է բուհում, սակայն նախարարը պատասխանել է, որ եթե այլ թեկնածուներ լինեին, ապա կառաջադրվեին. «Ես ձեզ ոչինչ չունեմ ասելուց, բացի ձեզ հետ ջերմ հարաբերություններ ունենալուց»։
Ի դեպ, բուհի դասախոս Ռուբեն Բաբայանը քիչ առաջ հայտարարեց, որ եթե իր` բուհից դուրս գալը խոչընդոտեն, ապա նա աշխատանքից ազատման դիմում կգրի։ Ուսանողները նշեցին` Բաբայանը թող չնեղանա, բայց իրենք դուռը ոչ մեկի առջև չեն բացելու։
Ավելի ուշ Բաբայանը կրկին մոտեցավ ուսանողներին ու ասաց, որ արդեն ազատման դիմում է գրել ու քանի որ բուհի դասախոս այլևս չի համարվում, պետք է լքի բուհը։ Ուսանողները բացեցին դուռը, ու Բաբայանը հեռացավ։
Բուհում բողոքի ակցիան շարունակվում է։
