Հայաստանի ֆուտբոլի առաջնության 34-րդ տուրի «Լոռի»-«Փյունիկ» հանդիպումից հետո, որն ավարտվեց 2:2 հաշվով, երևանյան ակումբի ներկայացուցիչները սթրեսային վիճակում էին գլխավոր մրցավարի ու մրցավարական որոշումների պատճառով:
Խաղի վերջնամասում, երբ կողմերն արդեն երկուական գնդակ էին փոխանակել, Էրիկ Վարդանյանի հիանալի անցումը խախտումով կասեցվեց «Լոռու» տուգանային հրապարակում: Սակայն հանդիպման մրցավար Արտակ Սիմոնյանը ոչ մի խախտում էլ չտեսավ, ու խաղը շարունակվեց: Չնայած դրանից հետո «Փյունիկը» կարողացավ գրավել «Լոռու» դարպասը, բայց մրցավարն այս անգամ էլ չհաշվեց դարպասի գրավումը:
Նման բաները կրքեր են բորբոքում և հույզեր հեղեղում միշտ, իսկ այս դեպքում՝ առավել ևս: «Լոռու» նկատմամբ հաղթանակը «Փյունիկին» մոտեցնում էր չեմպիոնական տիտղոսին: Երեք միավոր վաստակելու դեպքում երևանյան թիմին չեմպիոն դառնալու համար հարկավոր էր մրցաշարի վերջին տուրում հաղթել «Արարատին» ու տոնել հոբելյանական 15-րդ չեմպիոնությունը: Այ թե ինչո՛ւ էր այս խաղի արդյունքը չափազանց կարևոր «Փյունիկի» համար: Իսկ հիմա «Արարատ-Արմենիան» արդեն շատ լավ շանս ունի չեմպիոնական մրցավազքում շրջանցել իր հիմանական մրցակցին:
Վերադառնանք «Լոռի»-«Փյունիկ» վերջին հանդիպմանն ու հատկապես մրցավարական որոշումներին:
Խաղի ընթացքում կողմերից մեկի առավելության կամ ստեղծած պահերի մասին խոսելն ավելորդ է: «Փյունիկը» երկու անգամ հաշվի մեջ առաջ անցավ, բայց «Լոռին» երկու անգամ էլ կարողացավ վերականգնել հաշվի հավասարակշռությունը: Եվ այս լարված իրավիճակում Էրիկ Վարդանյանը, խաղն իր վրա վերցնելով, անհատական անցում կատարեց, որը «Լոռու» տուգանային հրապարակում կասեցվեց, իմ խորին համոզմամբ՝ կանոնների խախտումով: Այսինքն մրցավարը սխալվեց` չարձանագրելով խաղի կանոնների խախտում և չնշանակելով 11–մետրանոց տուգանային հարված:
Դրանից մի քանի րոպե անց «Փյունիկը» կարողացավ գրավել «Լոռու» դարպասը, բայց այս դեպքում էլ մրցավարները չհաշվեցին դարպասի գրավումը: Բայց ի տարբերություն նախորդ դրվագի, որում մրցավարը կոպիտ սխալվել էր, այս դրվագում որոշումը ճիշտ էր ընդունված, քանի որ արդյունավետ հարված կատարելուց առաջ «Փյունիկի» պաշտպանը ձեռքով կասեցրեց գնդակը:
Ամեն դեպքում 11–մետրանոցի չնշանակումը ստվեր գցեց խաղի վրա, ինչպես մեկ կաթիլ ձյութն է բավարար, որպեսզի մեկ տակառ մեղրը փչանա:
«Փյունիկի» համար հույժ կարևոր խաղում մրցավարական վրիպումը միանշանակ ազդեց խաղի ելքի վրա: Կարելի է ասել, թե 11–մետրանոցը դեռ գոլ չէ: Այո, գոլ չէ, բայց գոլ խփելու գրեթե 100–տոկոսանոց հնարավորություն է: Եվ հետո, «գոլ է, գոլ չէ»-ն կապ չունի. եթե կանոնների խախտում է կատարվել, այն պետք է համարժեք գնահատվի, առաջինը, բնականաբար, հանդիպման մրցավարի կողմից:
Մեր տեղեկությունների համաձայն` «Փյունիկ» ակումբը պատրաստվում է բողոք ներկայացնել մրցավարների աշխատանքի վերաբերյալ: Թեպետ, դժվար թե դա ինչ որ օգուտ տա:
Հա՛, կարող են մրցավարին որակազրկել, եթե բողոքի քննությամբ հաստատվի, որ կոպիտ և խաղի ելքի վրա ազդող վրիպում է թույլ տրվել, բայց խաղի հաշիվը կմնա ուժի մեջ՝ 2:2: Իսկ դա նշանակում է, որ «Արարատ-Արմենիան» հաղթանակի հասնելու դեպքում կդառնա Հայաստանի չեմպիոն:
Ավելացնեմ, որ ոչ ոք չի կարող հիմա վստահորեն ասել, թե «Արարատ-Արմենիան» հաստատ հաղթելու է «Արցախին» ու «Բանանցին» վերջին երկու տուրերում:
Դա փաստ չէ: Փոխարենը, փաստ է այն, որ այս պահին կորցրած միավորներով առաջատարն արդեն Վարդան Մինասյանի թիմն է:
Պարզապես ցավալի է, որ մրցավարական սխալների ազդեցին «Լոռի»-«Փյունիկ» խաղի ելքի վրա, ու եթե նույնիսկ «Արարատ-Արմենիան» իր վերջին երկու խաղերում էլ հաղթի իր մրցակիցներին, միևնույնն է, Վանաձորում գրանցված արդյունքի հետ կապված խոսակցությունները դեռ երկար են շարունակվելու:
