ԵՐԵՎԱՆ, 20 մայիսի — Sputnik. ՀՀ երկրորդ նախագահ Ռոբերտ Քոչարյանի դատական գործընթացները նպաստեցին, որ այսօր տեղի ունեցած գործընթացն արագանա։ Sputnik Արմենիայի հետ զրույցում նման կարծիք հայտնեց «Իմ քայլի» պատգամավոր Գևորգ Պապոյանը։
«Այն, ինչ կատարվում է դատարանների առջև, մարդկանց ներքին ցասումն է, որն արտահայտվում է խաղաղ բողոքի, զրույցների ձևով։ Մեր գերնպատակը ոչ թե մարդկանց ներս չթողնելն է, այլ դատավորների հետ երկխոսելը։ Դատարանի այն աշխատակիցը, որը շատ է ուզում ներս մտնել, պետք է թույլ տանք նրան մուտք գործել դատարան»,–ասաց ՀՀ վարչական դատարանի մոտ գտնվող պատգամավորը։
Նրա խոսքով` դատաիրավական համակարգի հանդեպ բոլորի մոտ առողջ մտահոգություն ու քննադատություն կա, քանի որ հեղափոխությունը, ըստ էության, չի հասել այստեղ։ Ըստ նրա` մարդիկ չեն վստահում դատաիրավական համակարգին։ «Մեզ պետք չէ խամաճիկային դատարան»,–իր խոսքն ամփոփեց Պապոյանը։
Հիշեցնենք` ՀՀ վարչապետ Նիկոլ Փաշինյանը մայիսի 19–ին հայտարարել էր, որ մայիսի 20-ի առավոտյան ժամը 08.30-ից պետք է արգելափակել հանրապետության՝ առանց բացառության բոլոր դատարանների ելքերն ու մուտքերը, այնպես, որ ոչ ոք ներս չմտնի։
Վարչապետն այսօր ժամը 12։00–ին կառավարությունից ուղիղ եթերով հանդես կգա հայտարարությամբ։
