ԵՐԵՎԱՆ, 18 մայիսի — Sputnik. Պաշտոնական Երևանը վստահ է, որ ՀԱՊԿ գլխավոր քարտուղարի հարցում համաձայնության կհասնեն։ Այսօր Երևանում ռուսական լրատվամիջոցների հետ զրույցում այս մասին ասել է Հայաստանի արտգործնախարար Զոհրաբ Մնացականյանը։
«Մենք կհասնենք կոնսենսուսի, կհանգենք պայմանավորվածության: Չկա որեւէ իրավիճակ, երբ մեր տարաձայնությունները լինեն այնպիսի մակարդակի, որը սպառնալիքի տակ կդնի համաձայնության գալու կարողությունը: Կարծում եմ՝ մոտ ժամանակներս մենք դա կապացուցենք։ Թույլ տվեք մեզ պայմանավորվել մինչև 2020թ-ի հունվարի 1-ը, քիչ մնաց», - ասել է Մնացականյանը։
Նա նշել է, որ կազմակերպության նախորդ գլխավոր քարտուղարի լիազորությունների վաղաժամկետ դադարեցումը կապված է եղել զուտ Հայաստանի ներքաղաքական հարցերի հետ։
Նշենք, որ ՀԱՊԿ գլխավոր քարտուղարի նշանակման հարցը դեռ չի լուծվել։ Երևանի և Մինսկի միջև տարաձայնություններ էին առաջացել։ Վեճերը սկսվել էին այն բանից հետո, երբ Հայաստանը ՀԱՊԿ գլխավոր քարտուղարի պաշտոնից հետ էր կանչել իր ներկայացուցիչ Յուրի Խաչատուրովին։
Հայաստանը պնդում էր, որ այդ պաշտոնում պետք է իր ներկայացուցիչը լինի մինչև 2020 թվականը։ Միևնույն ժամանակ Բելառուսն առաջարկում էր իր թեկնածուին` Անվտանգության խորհրդի քարտուղար Ստանիսլավ Զասին։
ՀԱՊԿ գլխավոր քարտուղարի պարտականություններն այս պահին կատարում է Վալերի Սեմերիկովը։
