Դանիելյանը կարծում է, որ Բակո Սահակյանն ու Արկադի Ղուկասյանը ՀՀ երկրորդ նախագահ Ռոբերտ Քոչարյանի խափանման միջոցի փոփոխման հարցով դատական նիստին դժվար թե ներկայանային առանց նախնական համաձայնության։
«Պարզ տրամաբանությունն ասում է, որ Արցախի ներկա ու նախկին նախագահների` Հայաստան գալու հետ կապված ինչ-որ համաձայնություն եղել է»,- ասում է նա։
Այլապես, ըստ քաղաքագետի, Արցախի ներկա և նախկին նախագահները չէին գա Երևան, դատարանն էլ նրանց միջնորդությունը չէր ընդունի։
«Իմ տպավորությունն այն է, որ Քոչարյանի խափանման միջոցը փոխելու համար Նիկոլ Փաշինյանին պետք էր, որ դա արվեր ինչ-որ եղանակով, որը կարծես թե իր ազդեցության տիրույթից դուրս է»,- ասում է Դանիելյանը։
Ըստ քաղաքագետի` Փաշինյանը հանրության մոտ իր դեմքը պահելու խնդիր ունի և ուզում է ցույց տալ, որ դիմել է իրենից կախված բոլոր հնարավոր միջոցներին, որպեսզի Քոչարյանը մնա կալանքի տակ, քանի որ ստեղծվել են համապատասխան հանրային տրամադրություններ։
Քոչարյանի խափանման միջոցը փոխելու երաշխավորագրով երեկ Երևանի ընդհանուր իրավասության դատարանի Նոր Նորքի նստավայր էին ժամանել Արցախի գործող ու նախկին նախագահներ Բակո Սահակյանն ու Արկադի Ղուկասյանը։
