ԵՐԵւԱՆ, 14 մայիսի — Sputnik. Հայ տղուն իսլամութիւն ընդունելու փաստն աննախադէպ չէ, բայց կը ստիպէ, որպէսզի հայկական կողմը մտածէ Թուրքիոյ մէջ անօրինական գտնուող գաղթականներու ճակատագրին մասին: Այդ մասին Sputnik Արմենիայի թղթակիցին հետ զրոյցին յայտարարեց թրքագէտ Վարուժան Գեղամեան:
Նախապէս Facebook-ի իր էջին վրայ Վարուժան Գեղամեան պատմած է, թէ ինչպէս թրքական հեռուստաալիքներէն մէկը ուղիղ եթերով 13–ամեայ հայ տղան` Արթուրը, իսլամութիւն կ’ընդունի: Փորձագէտը կ’ենթադրէ, որ տղան հայաստանցի անօրինական գաղթականներու երեխայ է:
«Չեմ կարծեր, որ ատիկա ցուցադրական միջադէպ է եւ ինչ–որ ընդգծուած ուղերձ ունի: Բայց տղուն ազգային պատկանելութիւնը բարձրաձայնելը, անշուշտ, աւելի հետաքրքիր դարձուցած է շոուն թուրք հանդիսատեսին համար», – ըսաւ ան:
Անոր խօսքով` տարբեր հաշուարկներով Թուրքիա կ’ապրի մօտ 30 հազար հայ: Եւ չի կարելի ընդհանրացնել հայ տղուն հետ կապուած միջադէպը, քանի որ նախօրօք դէպքեր եղած են, երբ հայերն իսլամութիւն ընդունած են: Բայց միջադէպը կրկին արդիական դարձուցած է Թուրքիոյ մէջ հայերու ձուլման եւ այդ երկրին մէջ անոնց իրաւունքներու պաշտպանութեան մասին հարցը: Չէ՞ որ անոնք յատուկ կարգավիճակ ունին, Հայաստան պատասխանատու է իր քաղաքացիներուն համար, բայց Սեւծովեան տնտեսական համագործակցութեան կազմակերպութեան լծակներէն բացի որեւէ կերպ չի կրնար օգնել լուծելու անոնց հարցը:
Անոր կարծիքով` հայկական իշխանութիւնները նաեւ պէտք է լրջօրէն մտածեն թրքական այն սպառնալիքին մասին, որ կրնան արտաքսել անօրինական հայ գաղթականներուն, եւ պատրաստ ըլլան ընդունելու զանոնք: Միաժամանակ, ան նշեց, որ 30 հազար հայ գաղթականներն աստիճանաբար բնակութիւն հաստատած են Թուրքիոյ մէջ եւ ատիկա յանկարծակի արտագաղթի հետեւանք չէ:
Օրերս հայկական մամուլին մէջ հաղորդագրութիւն տարածուած է այն մասին, որ յառաջիկային Թուրքիոյ մէջ կը սպասուին բաւական լուրջ իրադարձութիւններ` կապուած հայերու զանգուածային արտաքսման հետ: Միաժամանակ, Թուրքիոյ նախագահ Ռեճէպ Թայիպ Էրտողան յայտարարած է, որ ներկայ պահին այդ երկրին մէջ կը բնակի մօտ 100 հազար հայ, որոնցմէ մօտ 40 հազարը Թուրքիոյ քաղաքացիներ են: Մնացածը քաղաքացի չեն, բայց անոնց չեն պատրաստուիր վտարել:
