ԵՐԵՎԱՆ, 13 մայիսի — Sputnik. Կարող եմ ասել` ֆոնը շատ դրական է, կա փոխըմբռնում 2 վարչապետների միջև։
Այս մասին այսօր Լյուքսեմբուրգում վարչապետներ Նիկոլ Փաշինյանի և Քսավյե Բեթելի հանդիպումից հետո լրագրողների հետ զրույցում ասաց ՀՀ վարչապետի մամուլի խոսնակ Վլադիմիր Կարապետյանը։
«Հանդիպմանը քննարկվեց համագործակցության լայն շրջանակ, նաև` տնտեսական, խոսք գնաց բիզնես ֆորումների կազմակերպման, կրթության ոլորտում համագործակցության մասին։ Լյուքսեմբուրգի վարչապետը պատրաստակամություն հայտնեց ընդունել մեր ուսանողներին տարբեր բուհերից»,–տեղեկացրեց Կարապետյանը։
Նրա խոսքով` հայկական կողմը շնորհակալություն հայտնեց Լյուքսեմբուրգի վարչապետին` քաղաքական առումով Հայաստանին աջակցելու համար, մասնավորապես` անցած ամառ արդեն Լյուքսեմբուրգի խորհրդարանը վավերացրել է Հայաստան–ԵՄ համաձայնագիրը, իսկ 2 տարի առաջ ճանաչել Հայոց ցեղասպանությունը։
ՀՀ վարչապետ Նիկոլ Փաշինյանը Լյուքսեմբուրգի վարչապետ Քսավյե Բեթելին հրավիրել է մասնակցելու այս տարի հոկտեմբերին Երևանում կայանալիք ՏՏ համաշխարհային համաժողովին։
Նշենք, որ այսօր Լյուքսեմբուրգում կայացել է ՀՀ վարչապետ Նիկոլ Փաշինյանի պաշտոնական հանդիպումը Լյուքսեմբուրգի վարչապետ Քսավյե Բեթելի հետ։
Հիշեցնենք, որ Նիկոլ Փաշինյանը` տիկնոջ՝ Աննա Հակոբյանի հետ մայիսի 12-13-ին աշխատանքային այցով մեկնել է Լյուքսեմբուրգի Մեծ Դքսություն և Բրյուսել։
Նշենք նաև, որ վարչապետի պատվիրակության կազմում են ՀՀ արտաքին գործերի նախարար Զոհրաբ Մնացականյանը, վարչապետի գլխավոր խորհրդական Արսեն Գասպարյանը, վարչապետի օգնական Հրաչյա Թաշչյանը։
