ԵՐԵՎԱՆ, 9 մայիսի — Sputnik. Հայ հեղափոխական դաշնակցությունը պատրաստ է համագործակցել բոլորի հետ, բայց դա պետք է լինի իրենց օրակարգի և բարձրացրած հարցերի շուրջ։ Լրագրողների հետ զրույցում նման կարծիք հայտնեց ՀՅԴ Հայաստանի նորընտիր Գերագույն մարմնի ներկայացուցիչ Իշխան Սաղաթելյանը` պատասխանելով հարցին, թե պատրա՞ստ է ՀՅԴ–ն համագործակցել ՀՀ երկրորդ նախագահ Ռոբերտ Քոչարյանի հետ։
«Մենք համագործակցում ենք օրակարգի շուրջ, անձերը կապ չունեն։ Մենք այս պահին մեր առջև խնդիր չենք դրել Ռոբերտ Քոչարյանի կամ որևէ մեկ այլ անձի հետ համագործակցելու կամ չհամագործակցելու։ Թե՛ գործող իշխանությանն անվստահություն հայտնելու հարցով, թե՛ ընդդիմության ճակատ ձևավորելու առումով` որևէ մեկի հետ քննարկում չենք ունեցել»,–ասաց Սաղաթելյանը։
Հիշեցնենք` որ երեկ Ռոբերտ Քոչարյանը Reuters–ին տված գրավոր հարցազրույցում հայտնել էր, որ Հայաստանում նոր քաղաքական գործիչներ ու ընդդիմադիր կուսակցություններ են հայտնվում։ Քոչարյանի խոսքով` այդ գործընթացը, անկասկած, կհանգեցնի նոր հզոր քաղաքական ուժի ստեղծման, որն ունակ կլինի շատ արագ մարտահրավեր նետել նոր իշխանություններին:
