ԵՐԵՎԱՆ, 8 մայիսի — Sputnik. Կուսակցության կասեցման մասին որոշումը Սահմանադրական դատարանն է կայացնում։ Լրագրողների հետ զրույցում, ամփոփելով պաշտոնավարման 1 տարին, ասաց ՀՀ վարչապետ Նիկոլ Փաշինյանը` անդրադառնալով Հանրապետական կուսակցության կասեցման մասին հարցին։
«Մեր այսօրվա օրենսդրությամբ կուսակցության գործունեությունը կասեցնելու համար հիմքեր են պետք։ Բացի այդ, Հանրապետական կուսակցությունը կասեցնելը պոզով–պոչո՞վ է լինում։ Բա Հանրապետական կուսակցությունը որ կասեցված չի` ի՞նչ է։ Ժողովուրդն է կասեցրել նրա գործունեությունը»,–ասաց Փաշինյանը։
Նա նշեց, որ չնայած այն հանգամանքին, որ ՀՀԿ–ն 1995–ից իշխանություն է Հայաստանում, սակայն վերջին ընտրություններում խորհրդարանից դուրս մնաց` ժողովրդի ընտրությամբ։ Ըստ նրա` ուշագրավ էր այն հանգամանքը, որ ընտրություններն այնքան ազատ ու արդար էին, որ ՀՀԿ–ն Սահմանադրական դատարան էլ չդիմեց` դրանց արդյունքների վիճարկման համար։
