ԱԱԾ–ն զբաղվում է, բայց չի հայտարարում. Փաշինյանը խոսեց օտարերկրյա գործակալների մասին

ԵՐԵՎԱՆ, 8 մայիսի — Sputnik. Հայաստանից պետք է արմատախիլ արվեն արևմտամետություն, ամերիկամետություն, ռուսամետություն, նաև հակաամերիկյանություն, հակառուսականություն, հակաեվրոպականություն երևույթները։ Այսօր հրավիրված ասուլիսի ժամանակ այս մասին հայտարարեց ՀՀ վարչապետ Նիկոլ Փաշինյանը` պատասխանելով Հայաստանի քաղաքական դաշտում օտարերկրյա գործակալների առկայության մասին իր նախկին հայտարարությանը վերաբերող հարցին։

Փաշինյանը վստահեցրեց, որ ԱԱԾ–ն Հայաստանի անվտանգությանը վերաբերող խնդիրները պահում է հսկողության տակ։ Ինչ վերաբերում է իր նշած խնդրին, ապա երբ որոշ գործեր կհասունանան այնքան, որ արդեն այլ փուլ կմտնեն, հանրությունը դրանց մասին տեղեկություն կստանա։

Իսկ մինչ այդ Փաշինյանը նոր հայտարարություն արեց` գործակալներից զատ կան նաև ազդեցության գործակալներ։ «Կարծում եմ` մեծ գաղտնիք չէ, որ Հայաստանի քաղաքական դաշտում եղել են, կան, կլինեն մարդիկ, որոնց գործունեությունը կարելի է որակել որպես ազդեցության գործակալ։ Ես նաև այդպիսին եմ համարում բոլոր այն մարդկանց, որոնք Հայաստանում ինչ–որ հարց լուծելու համար գործողություններ են ձեռնարկում օտարերկրյա օգնություն ստանալու համար»,– ասաց նա։

Իր ասածը Փաշինյանը նորություն չի համարում` հավելելով, որ նման անձանց գործունեությունը բաց է, հրապարակային ու բոլորին տեսանելի ։

Հիշեցնենք` 2019թ–ի փետրվարի 27-ին Իրանում հայ համայնքի հետ հանդիպմանը ՀՀ վարչապետը հայտարարել էր, որ Հայաստանում քաղաքական գործիչներ կան, որոնք օտարերկրյա գործակալներ են։