ԵՐԵՎԱՆ, 2 մայիսի — Sputnik. Հայաստանից կարգելվի մետաղի ջարդոնի արտահանումը։ Այսօր կառավարության նիստում հայտարարեց ՀՀ տնտեսական զարգացման և ներդրումների նախարար Տիգրան Խաչատրյանը` կառավարությանը ներկայացնելով նախարարության մշակած օրինագիծը։
Օրինագծի համաձայն` Հայաստանից սև մետաղի արտահոսքն արգելելու համար առաջարկվում է ոլորտը կարգավորել հատուկ թույլտվություններով։
Միաժամանակ կառավարությունը մտադիր է խթանել Հայաստանում մետաղի վերամշակող ընկերությունների ստեղծումը։
«Մասնավորապես` խոսքը վերաբերում է հին ավտոմեքենաների թափքերին, որոնք Հայաստանում ամենուր են, ժանգոտած կրպակներին և այլն։ Ես ուրախ եմ, որ որոշակի արձագանքներ կան, կան ընկերություններ, որոնք դաշտերից, տարբեր տեղերից միջոցներ են ձեռնարկում այդ աղբը, այդ թափոնը հավաքելու»,– նախագծի քննարկման ժամանակ ասաց վարչապետ Նիկոլ Փաշինյանը։
Խաչատրյանն էլ ավելացրեց, որ սա նաև լրացուցիչ աշխատատեղեր կապահովի։ Այսօր արդեն բազմաթիվ մարդիկ ներգրավված են թափոնների հավաքման գործընթացում։
Նախարարը հայտնեց նաև, որ ոլորտը ժամանակին չկարգավորելու պարագայում ցեմենտի շուկայում առկա խնդիրը կարող է կրկնվել նաև մետաղի շուկայում։
«Այս ընթացքում մեծ չափերի է հասել մետաղական ամրանների ներկրումը Իրանից։ Այսօր, եթե շուկայում 240-250 հազար դրամով վաճառվում է տեղական, ռուսական կամ ուկրաինական ամրանը, ապա իրանականը վաճառվում է 220-230 հազար դրամով»,– ասաց Խաչատրյանը։
ՀՀ քաղաքաշինության կոմիտեի նախագահ Վահագն Վերմիշյանն էլ այս համատեքստում հիշեց 90–ական թվականները, երբ տոննաներով ջարդոն էր արտահանվում Հայաստանից։
«Հանրապետության ողնաշարը կոտրվեց։ Ամբողջ ծանր շինարարական տեխնիկան, ռելսերը, գործարանային սարքերը ջարդոնի անվան տակ դուրս եկան հանրապետությունից։ Այնինչ Չինաստանն էժան գներով այդ ջարդոնը ներմուծում էր, տեխնոլոգիական նորամուծություններով վերազինում այդ ստանոկները, ու հիմա զարգացած արդյունաբերություն ունեն»,– ասաց Վերմիշյանը։
Նա հայտարարեց, որ կառավարությունը պետք է արգելի հատկապես սև մետաղի արտահանումը, որը Հայաստանի ռազմավարական հումքն է։
Կառավարությունը հավանություն տվեց օրենքի նախագծին, որը կներկայացվի Ազգային ժողովին։
