ԵՐԵՎԱՆ, 2 մայիսի — Sputnik. Կառավարությունն այսօրվա նիստում բավական լայն քննարկման արժանացրեց ԱԺ «Բարգավաճ Հայաստան» խմբակցության պատգամավորների օրենսդրական նախաձեռնությունը, որով առաջարկվում է քրեականացնել կենդանիների նկատմամբ դաժան վերաբերմունքը:
Վարչապետ Նիկոլ Փաշինյանը նշեց, որ գաղափարն ընդունելի է, բայց կարևոր է ծայրահեղությունների մեջ չընկնել:
«Չափանիշները պետք շատ հստակ լինեն, որպեսզի այնպիսի իրավիճակի առաջ չկանգնենք, որ, օրինակ, մարդն իր բակում, ասենք, ծննդյան օրվա առիթով գառ մորթի, գնանք, քրեական գործ հարուցենք», - ասաց վարչապետը:
Փաշինյանը նշեց, որ համացանցում այսօր կենդանիների նկատմամբ դաժան վերաբերմունքի բազմաթիվ օրինակներ կան: Հիշեց նաև, որ նման դեպքերի ինքն անձամբ ականատես է եղել քրեակատարողական հիմնարկում:
«Երբեմն կենդանիներին, օրինակ, հրաձգարանի զվարճանքի համար թիրախ են դարձնում, բազմաթիվ են դեպքերը», - ասաց վարչապետը:
Գործադիրի անդամներից շատերն էլ կենդանիների նկատմամբ բռնության դեպքեր հիշեցին։
ԱԻ նախարարը խոսեց տարիներ առաջ համացանցում հայտնված առյուծի ու ավանակի կենաց ու մահու պայքարի տեսանյութը: «Այստեղ ոչ թե ավանակին, այլ առյուծին էր պետք պաշտպանել»,– ասաց Ցոլակյանը։
«Առյուծն էլ իրավունքներ ունի, առյուծին էլ է պետք պաշտպանել»,– կատակեց վարչապետը։
Քննարկումը գուցե ավելի երկարեր, եթե Փաշինյանը կոչ չաներ «շատ չխորանալ»:
Ինչ վերաբերում է ԲՀԿ նախագծին, կառավարության անդամները որոշեցին այն քննարկել հեղինակների ու բոլոր շահագրգիռ կողմերի հետ` իրավիճակին համարժեք լուծումներ գտնելու համար։
