ԵՐԵՎԱՆ, 30 ապրիլի — Sputnik. Արցախը մեկուսացած է միջազգային հանրությունից և դա բացասաբար է ազդում մարդու իրավունքների պաշտպանության վրա։ Այս մասին այսօր Հայաստանի խորհրդարանում, մարդու իրավունքների պաշտպանության եւ հանրային հարցերի մշտական հանձնաժողովի անդամների հետ հանդիպմանն ասաց Արցախի Հանրապետության մարդու իրավունքների պաշտպան Արտակ Բեգլարյանը։
«Եթե լինեին միջազգային շփումներ ու միջազգային ռեսուրսներ մտնեին Արցախի հանրապետություն, մեր քաղհասարակությունն ավելի ուժեղ կլիներ վերհանելու, քննարկելու ու նաև հանրային վերահսկողություն իրականացնելու մարդու իրավունքներին վերաբերող տարբեր հարցերում»,– ասաց Բեգլարյանը։
Առայժմ այդ հարցը լրացվում է Հայաստանի խորհրդարանականների ու իրավապաշտպան կառույցների` եվրոպական կառույցներում ներգրավվածության շնորհիվ։
Բայց Արցախի հետ կապված հիմնական խնդրի պատճառը, Բեգլարյանի համոզմամբ, Ադրբեջան է։ «Այս տեսանկյունից գլխավոր արգելակներն Ադրբեջանում են։ Միջազգային բազմաթիվ կառույցներ հրաժարվում են Արցախում ծրագրեր իրականացնել, նրանց հիմնական փաստարկը լինում է ոչ այնքան չճանաչվածությունը, որքան Ադրբեջանի ռեակցիան»,– ասաց Բեգլարյանը։
Այս իրավիճակը, Արցախի ՄԻՊ–ի խոսքով, հանգեցնում է Արցախում մարդու իրավունքների խախտման բազմաթիվ դեպքերի, այդ թվում` կրթական` արցախյան կրթական հաստատությունների դիպլոմների ճանաչվածության առումով, միջազգային տարբեր ծրագրերին մասնակցության, առողջապահական խնդիրների հետ կապված, երբ արցախցին չի կարողանում արտերկրում բուժման մեկնել` իր երկրի կարգավիճակի պատճառով։ Հաճախակի են նաև դեպքերը, երբ խախտվում է Արցախի քաղաքացիների ազատ տեղաշարժի իրավունքը` կապված արտերկիր մուտքի արտոնագիր ստանալու հետ։
«Հատկապես վերջին տարիներին Ադրբեջանը հետևողական է Արցախում միջազգային ներդրումների հարցում։ Որոշ դեպքերում անգամ քրեական գործեր են հարուցել։ Եթե հիշում եք` Վարդան Սերմաքեշի հետ կապված։ Նա թեև շվեյցարահայ գործարար է, որը Արցախում ներդրում է արել, ինչի պատճառով Ադրբեջանը հայտարարել է, որ քրեական հետապնդում է սկսել նրա նկատմամբ։ Բազմաթիվ դեպքեր կան, որ միջազգային ընկերություններ Արցախից դուրս են եկել հենց Ադրբեջանի ճնշումների պատճառով»,– ասաց Արցախի ՄԻՊ–ը։
Արդյունքում Արցախում առաջանում է սոցիալ–տնտեսական ծանր իրավիճակ, աշխատատեղերի կրճատում և աղքատության բարձր մակարդակ։
Արտակ Բեգլարյանը համոզմունք հայտնեց, որ այս բոլոր իրավունքների խախտման դեպքերը միջազգային հանրությանը ներկայացնելու հարցում մեծ անելիք ունեն Հայաստանի խորհրդարանականներն ու հատկապես` մարդու իրավունքների պաշտպանության և հանրային հարցերի մշտական հանձնաժողովի անդամները։
