ԵՐԵՎԱՆ, 29 ապրիլի — Sputnik. Արցախում նոր զորանոցների կամ առհասարակ նոր ռազմական օբյեկտների կառուցումը վերջին 5 տարիների ընթացքում կտրուկ ակտիվացել է։ Facebook սոցիալական ցանցի իր էջում այս մասին գրել է Արցախի նախագահ Բակո Սահակյանի խորհրդական Տիգրան Աբրահամյանը։
«Երևի թե չկա այնպիսի ռազմական նշանակության տեղամաս, որտեղ ամեն տարի հենց միայն այս ուղղությամբ փոփոխություններ չլինեն»,– գրել է նա ու լուսանկարներ հրապարակել։
Նրա խոսքով` զինծառայողների սոցիալ-կենցաղային վիճակի բարելավումը նաև ուղիղ կապ ունի տվյալ ստորաբաժանման մարտունակության վրա։
Հիշեցնենք, որ Աբրահամյանն ավելի վաղ հայտնել էր, որ որոշ ժամանակ անց արցախյան բոլոր դիրքերում ամառային բաղնիքներ կլինեն։
Աբրահամյանն օրեր առաջ Sputnik Արմենիայի եթերում խոսել է առաջնագծում տիրող իրավիճակի, բանակցային գործընթացի, բանակաշինության, ինչպես նաև Բակո Սահակյանի` Արցախի նախագահի առաջիկա ընտրությանը մասնակցելու մասին:
