ԵՐԵՎԱՆ, 29 ապրիլի — Sputnik. Շիրակի մարզպետարանի 142 աշխատակից պարգևատրվել է ընդհանուր 15 մլն 78 հազար դրամով: Գումարը նախատեսված է եղել Հայաստանի Հանրապետության 2019 թվականի պետական բյուջեի առաջին եռամսյակի «Պարգևատրումներ, դրամական խրախուսումներ և հատուկ վճարներ» հոդվածով:
Աշխատակիցներից 12-ի պարգևատրումը, օրենքով նախատեսված կարգով, եղել է Շիրակի մարզպետի կարգադրությամբ և կազմել է ընդհանուր 2 միլիոն 362 հազար դրամ: Իսկ մարզպետարանի 130 աշխատակիցներ էլ պարգևատրվել են գլխավոր քարտուղարի համապատասխան հրամանով:
Պարգևատրումից հրաժարված Շիրակի մարզպետ Տիգրան Պետրոսյանը Sputnik Արմենիայի հետ ունեցած զրույցի ժամանակ վստահեցրեց՝ չի հրաժարվել այն պատճառով, որ դեմ է պարգևավճարին. պարզապես իր աշխատանքային ընթացքը նոր է մեկնարկել:
«Հրաժարվել եմ ոչ թե գնահատական տալով երևույթին, այլ այն պատճառով, որ մեր աշխատանքները նոր մեկնարկային փուլում են: Քանի որ 2 ու կես ամիս է ինչ կառավարման համակարգում եմ, և ակտիվ աշխատանքային պրոցեսի մեջ ենք, այս փուլում որոշեցի ձեռնպահ մնալ»,-նշեց Տիգրան Պետրոսյանը:
Ի դեպ, պարգևավճարից նույն բացատրությամբ հրաժարվել են նաև մարզպետի խորհրդականն ու օգնականը:
