ԵՐԵՎԱՆ, 28 ապրիլի — Sputnik. Պարոն փոխմարզպետն իրեն մի քիչ լավ չի պահել երիտասարդների հանդեպ, այն էլ երեկվա գեղեցիկ օրով։ Այս մասին Sputnik Արմենիայի հետ զրույցում ասաց Եղեգիս խոշորացված համայնքի ղեկավար Արթուր Ստեփանյանը` մեկնաբանելով ապրիլի 27–ին Քաղաքացու օրվան նվիրված միջոցառումների ժամանակ Վայոց Ձորում գրանցված միջադեպը։
Հիշեցնենք, Վայոց ձորի փոխմարզպետ Ռազմիկ Տոնոյանը երեկ հաղորդում է ներկայացրել Ոստիկանության Եղեգնաձորի բաժին՝ տեղեկացնելով, որ Քաղաքացու օրվա նվիրված միջոցառման ժամանակ իրեն են մոտեցել ԱԺ ԲՀԿ խմբակցության պատգամավոր Սերգեյ Բագրատյանը և Վայոց Ձորի մարզի Եղեգիս համայնքի Արտաբույնք բնակավայրի վարչական ղեկավար Արմեն Սեդրակյանը: Ըստ Տոնոյանի հաղորդման՝ պատգամավորն ու վարչական շրջանի ղեկավարն իր հասցեին սեռական բնույթի հայհոյանքներ, անվայել արտահայտություններ են հնչեցրել, վիրավորել, փորձել են հարձակվել իր վրա և հարվածել:
![Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից - Sputnik Արմենիա](https://cdn.am.sputniknews.ru/img/1831/79/18317958_0:0:1000:1772_600x0_80_0_0_c46d5b68f93ccdc3e39eb3f28cddf03d.jpg)
Sputnik Արմենիայի թղթակցի հետ զրույցում պատգամավորը հրաժարվեց մեկնաբանություններ տալ՝ միայն ասելով, որ միջադեպ չի եղել: «Ոչ մեկին չեմ հանդիպել»,- եզրափակեց իր խոսքը Բագրատյանը:
Միջադեպի հետ կապված փորձեցինք պարզաբանում ստանալ Եղեգիս խոշորացված համայնքի ղեկավար Արթուր Ստեփանյանից (Արտաբույնք վարչական համայնքը Եղեգիս համայնքի կազմում է)։ «Ի՞նչ միջադեպ, այնտեղ միջադեպ չի եղել: Պարոն Տոնոյանն ինչ ասես կգրի: Ուրիշ խնդիրներ են եղել: Պարոն փոխմարզպետն իրեն մի քիչ լավ չի պահել երիտասարդների հանդեպ, այն էլ երեկվա գեղեցիկ օրով. երիտասարդներն աղջիկների հետ են եղել, ասել է՝ բիչոկը վերցրեք, առանձնազրույց են ունեցել, վիճաբանություն է եղել, այդ ժամանակ մեր հարգարժան պատգամավորն ասել է՝ դե վերջ տվեք, չի՛ կարելի»:
Այն հարցին`եթե միջադեպ չի եղել է, ինչու է փոխմարզպետը հաղորդում ներկայացրել Ոստիկանություն, Ստեփանյանն ասաց. «Հեսա, տարի ու կես ա՝ պարոն Տոնոյանի ձեռից Ոստիկանությունում եմ, պարոն Տոնոյանը ինչ էլ գրում է, Ոստիկանություն անմիջապես հաղորդագրություն պիտի ներկայացնի: Իսկ ինչ վերաբերում է իմ վարչական ղեկավարին, նրա հետ էլ ինքը լավ չի խոսել, ասել է՝ այ տղա, դու ով ես: Ինքն էլ ասել է՝ ես էս ինչ համայնքի վարչական ղեկավարն եմ, բա դու ով ես»: Պարոն Ստեփանյանը տեղեկացրեց, որ պատգամավոր Բագրատյանն ու Արտաբույնքի ղեկավար Սեդրակյանը ոչ միայն համագյուղացիներ, այլև բարեկամներ են: Նա հավելեց, որ, այո՛, Սեդրակյանը հրավիրվել է Ոստիկանություն, իր բացատրությունը տվել է ու անցել իր գործերով:
![Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից - Sputnik Արմենիա](https://cdn.am.sputniknews.ru/img/1831/43/18314360_0:0:1000:1768_600x0_80_0_0_addd7b2bf5668cdaed953f774f41fdd4.jpg)
Արթուր Ստեփանյանը չհերքեց մեզ հասած այն տեղեկությունները, որ Ռազմիկ Տոնոյանը պարբերաբար, սովորական քաղաքացիների հետ զրուցելիս, գաղտնի ձայնագրություններ է իրականացնում, որոնք հետագայում օգտագործում է նրանց դեմ։
«Մեր Շատինի թեկնածուից է վարակվել, 2017-ի Եղեգիս խոշորացված համայնքի ընտրությունների ժամանակ ինձ հետ մրցակից թեկնածու էր Տիգրանը Խուդոյանը, այ ինքն ուժեղ զապիս, նկար էր անում, հիմա իրար հետ իրանք ընկերներ են, էդ մեթոդը փոխանցել է մեր փոխմարզպետին»:
Իսկ Ռազմիկ Տոնոյանն այդ տեղեկություններն անլուրջ անվանեց. «Եթե որևէ մեկին ես ձայնագրել եմ գաղտնի և օգտագործել եմ իր դեմ, դրա համար կան համապատասխան մարմիններ՝ Ոստիկանություն, ԱԱԾ, ամեն ինչ էլ կա, այսօր ազատ է այդ ամեն ինչը, կարող են ներկայացնել, որ կա նման բան: Անլուրջ է»:
Փոխմարզպետը վստահ է, որ իր մասին նման լուրերի տարածման պատճառն այն է, որ որոշ համայնքներում ցանկանում են հին աշխատելաոճով աշխատել։
«Չեն կարողանում պատկերացնել, որ այո, եղել է հեղափոխություն, նոր Հայաստանում այլևս աշխատողը հենց այնպես չպիտի գումար ստանա, պիտի աշխատավայրում լինի, նման խնդիրներ կան: Օրինակ` ես այցելել եմ տարբեր համայնքներ, որտեղ տեսել եմ իբրև հոսանքի ծախսեր, որոնք այնքան քիչ են, որ դրանցով անհնար է ջեռուցել սենյակները, այսինքն` դրանից հետևություն, որ համայնքի ղեկավարները ձմռանը աշխատանքի չեն եղել»,–ասում է Տոնոյանը:
![Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից Ո՞վ է ստում. փոխմարզպետը հարձակման ենթարկվե՞լ է, թե՞ ոչ. լուսանկարներ դեպքի վայրից - Sputnik Արմենիա](https://cdn.am.sputniknews.ru/img/1831/79/18317963_0:0:1000:1777_600x0_80_0_0_0320185410016e34fee2b83bbd9721ec.jpg)
Վայոց Ձորի փոխմարզպետի խոսքով` հենց այս ամենի հետևանքով տարբեր մարդիկ իր դեմ են բացասական են տրամադրվել: Նա խոստացավ շուտով հրապարակել լուսանկարներ, որոնք ապացուցում են, որ երեկ՝ Քաղաքացու տոնի առիթով միջոցառման ժամանակ միջադեպ իրոք եղել է:
Ի դեպ, տեղեկացնենք, որ Վայոց ձորի փոխմարզպետ Ռազմիկ Տոնոյանը ծնվել է Արմավիրի մարզի Արաքս գյուղում: Վերջին խորհրդարանական ընտրություններում նա Արմավիրի մարզում «Իմ քայլի» կողմից առաջադրված 14 ռեյտինգային թեկնածուներից մեկն էր: