Քաղաքացու օրվա կապակցությամբ կազմակերպված միջոցառումների հետ կապված` ապրիլի 27–ին Երևանի մի շարք փողոցներ փակ կլինեն։ Այս մասին տեղեկացնում է ՀՀ ոստիկանությունը։
Այսպիսով, ապրիլի 26-ին, ժամը 23:30-ից մինչև ապրիլի 27-ին, ժամը 24:00-ն երկկողմանի փակ է լինելու Մաշտոցի պողոտան՝ Ֆրանսիայի հրապարակից մինչև Հաղթանակի կամուրջ:
«Ապրիլի 26-ին, ժամը 21:00-ից արգելվելու է տրանսպորտային միջոցների կայանումը Մաշտոցի պողոտայում՝ Ֆրանսիայի հրապարակից մինչև Մաշտոցի պողոտա-Ամիրյան փողոց խաչմերուկ»,–նշված է ոստիկանության հայտարարության մեջ։
Ապրիլի 27–ին արգելվելու է երթևեկությունը Թումանյան-Սարյան փողոցների խաչմերուկից դեպի Մաշտոցի պողոտա, Թումանյան-Տերյան փողոցների խաչմերուկից դեպի Մաշտոցի պողոտա, Պուշկինի-Սարյան փողոցների խաչմերուկից դեպի Մաշտոցի պողոտա, Արամի-Կողբացու փողոցների խաչմերուկից դեպի Մաշտոցի պողոտա, Ամիրյան-Սարյան փողոցների խաչմերուկից դեպի Մաշտոցի պողոտա, Ամիրյան-Զաքիյան փողոցների խաչմերուկից դեպի Մաշտոցի պողոտա:
Հիշեցնենք, որ ապրիլի 9–ին ԱԺ–ն կողմ քվեարկեց ապրիլի վերջին շաբաթ օրը «Քաղաքացու օր» հռչակելու և, ըստ այդմ էլ, «Տոների ու հիշատակի օրերի մասին» օրենքում փոփոխություններ անելու մասին նախագծին։ Կառավարությունն էլ այդ օրը տոնական միջոցառումներ իրականացնելու համար պահուստային ֆոնդից 124 մլն դրամ տրամադրեց։
