Տեղական ցեմենտ արտադրողներին պաշտպանելու նպատակով կառավարությունն առաջարկել է պետական տուրք սահմանել ներկրվող ցեմենտի և դրա հումքի՝ կլինկերի վրա։ Ազգային ժողովի տնտեսական հարցերի մշտական հանձնաժողովի նախագահ, «Իմ քայլը» խմբակցության պատգամավոր Բաբկեն Թունյանը Sputnik Արմենիայի հետ զրույցում նշեց, որ իր գլխավորած հանձնաժողովը նախատեսել է ստեղծել աշխատանքային խումբ՝ պարզելու համար, թե որքան է կազմում ցեմենտի իրական ինքնարժեքը, քանի որ առանց դա հասկանալու, անհիմն է պետական տուրքի չափի մասին խոսակցությունը և ինչպիսի ազդեցություն կունենան այդ կարգավորումները ընդհանուր տնտեսության վրա։ Խորհրդարանի «Բարգավաճ Հայաստան» խմբակցությունը պնդում է, որ պետական տուրք սահմանվի նաև ներկրվող կլինկերի վրա, ինչը կառավարության համար անընդունելի է։
«Նույն «Բարգավաճ Հայաստան» խմբակցությունը կառավարության ներկայացրած բոլոր օրինագծերի դեպքում պահանջում է հիմնավորումներ, սակայն այս պարագայում, զարմանալիորեն, նման հիմնավորումներ չեն պահանջում», - նկատում է Բաբկեն Թունյանը։
Ըստ պատգամավորի, «Բարգավաճ Հայաստանի» տեսակետը բոլորին շատ հասկանալի է, մոտիվացիան նույնպես։
«Այն թյուր կարծիքը, որ մեր որոշումն ուղղված է ինչ-որ աշխատատեղեր փակելուն, իրականությանը չի համապատասխանում»,-վստահեցնում է իշխող քաղաքական ուժի պատգամավորը։
Բաբկեն Թունյանի խոսքով, հիմքեր կան կասկածելու, որ ցեմենտ արտադրող տեղական ընկերությունները կարող են գերշահույթներ ունենալ։ Ազգային ժողովն առաջին ընթերցմամբ, որոշ փոփոխություններով օրինագիծն ընդունել է և ցեմենտի ներկրման պետական տուրքը սահմանափակվել է մեկ տարի ժամկետով, իսկ կլինկերի պետական տուրքը նախագծից հանվել է։ Վիճահարույց օրինագիծը, ըստ «Արարատցեմենտ» ընկերության տնօրինության, կարող է աշխատատեղերի կրճատման պատճառ դառնալ։
