ԵՐԵՎԱՆ, 25 ապրիլի — Sputnik. Արցախի պաշտպանության նախարարությունը հերքել է ադրբեջանական կայքերի լուրերը, որ հայկական առաջապահ ուժերը կրակահերթեր են արձակել ադրբեջանական Չիրագլի գյուղի ուղղությամբ։ Այս մասին տեղեկանում ենք Արցախի ՊՆ–ի պաշտոնական կայքից։
Ադրբեջանական որոշ լրատվամիջոցներ լուրեր էին տարածել, որ իբր ապրիլի 24-ի ժամը 17:30-ի և ապրիլի 25-ի ժամը 15:20-ի սահմաններում Չիրագլի գյուղի ուղղությամբ կրակոցների հետևանքով գնդակոծության տակ են հայտնվել տներից մեկի բակում գտնվող 4-ից 13 տարեկան մի քանի աղջիկ երեխաներ:
«Դրանք սադրիչ լուրեր են։ Մեր պատրաստակամությունն ենք հայտնում, անհրաժեշտության դեպքում, վերոնշյալ բնագծերում առկա իրավիճակը բնութագրող տեսագրությունները՝ ֆիքսված տեսադիտարկման համակարգերով, ըստ ժամանակագրության ներկայացնել հանրության առավել լայն շրջանակների ուշադրությանը»,–նշված է Արցախի ՊՆ–ի հաղորդագրության մեջ։
Արցախի զինված ուժերի հրամանատարությունը կոչ է անում ադրբեջանական կողմին ձեռնպահ մնալ շփման գծում իրադրությունն արհեստականորեն սրելու անհեռանկար մարտավարությունից և շարունակել պահպանել կառուցողական կեցվածք:
