ԵՐԵՎԱՆ, 25 ապրիլի — Sputnik. Երևան քաղաքի ընդհանուր իրավասության դատարանի երեք դատավորների` Նելլի Բաղդասարյանի, Հարություն Մանուկյանի և Դավիթ Գրիգորյանի վարքագծի վերաբերյալ դիմում է եղել ՀՀ դատավորների ընդհանուր ժողովի Էթիկայի և կարգապահական հարցերի հանձնաժողով, որպեսզի նրանց նկատմամբ կարգապահական վարույթ հարուցվի։ Այս մասին գրում է «Ժողովուրդ» օրաթերթը։
Թերթը հիշեցնում է, որ այդ դատավորները տարբեր պատճառաբանություններով հրաժարվել էին քննել սահմանադրական կարգը տապալելու համար մեղադրվող Ռոբերտ Քոչարյանի խափանման միջոցի հարցը։
«Էթիկայի հանձնաժողովը քննել է և կարգապահական վարույթ է հարուցել դատավորների նկատմամբ` գործն ուղարկելով բարձրագույն դատական խորհուրդ, որպեսզի այնտեղ որոշում կայացնեն` դատավորներին կարգապահական պատասխանատվության ենթարկելու կամ հանձնաժողովի դիմումը մերժելու վերաբերյալ»,– գրում է թերթը։
ՍԴ նախագահը պարզաբանել է, թե ինչու են մերժվել Քոչարյանի պաշտպանների դիմումները
Բարձրագույն դատական խորհրդի (ԲԴԽ) մամուլի և հասարակայնության հետ կապերի ծառայության պետ Արման Խաչատրյանը հաստատել է տեղեկությունը՝ հայտնելով, որ իրենք ստացել են ՀՀ դատավորների ընդհանուր ժողովի էթիկայի և կարգապահական հարցերի հանձնաժողովի դիմումը:
Ի դեպ, դատավորները դիմել են ԲԴԽ, որպեսզի նիստն անցկացվի դռնփակ։
Հիշեցնենք` ՀՀ 2–րդ նախագահ Ռոբերտ Քոչարյանը 2018 թվականի հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
Ռոբերտ Քոչարյանը մարդկանց կրակելու հրաման չի տվել. Սամվել Բաբայան
Քննչական մարմինը Քոչարյանի նկատմամբ խափանման միջոց էր ընտրել կալանավորումը։
Առաջին ատյանի դատարանը Ռոբերտ Քոչարյանին կալանավորելու միջնորդությունը բավարարել էր, իսկ Վերաքննիչ դատարանը Քոչարյանին ճանաչել էր անձեռնմխելի և ազատել կալանքից:
Ավելի ուշ քրեական գործի նախաքննությունը վարող ՀՔԾ քննիչը որոշում էր կայացրել Ռոբերտ Քոչարյանի նկատմամբ խափանման միջոց ընտրել ստորագրությունը չհեռանալու մասին:
Իսկ Վճռաբեկ դատարանը փաստաբանների բողոքի հիման վրա որոշում էր կայացրել գործն ուղարկել լրացուցիչ քննության, որի ավարտին վերաքննիչ դատարանը Քոչարյանի նկատմամբ կիրառված կալանքը ուժի մեջ թողնելու որոշում էր կայացրել։ Այդ որոշման հիման վրա դեկտեմբերի 7-ին Ռոբերտ Քոչարյանը դարձյալ կալանավորվեց։
