ԵՐԵՎԱՆ, 25 ապրիլի — Sputnik. ԵԱՏՄ–ին Հայաստանի անդամակցումը մասշտաբային էֆեկտ ապահովեց, Տվերի մարզում եվրասիական ԶԼՄ–ների երկրորդ կոնգրեսի ժամանակ ասաց ՀՀ տնտեսական զարգացման և ներդրումների նախարարության ԵԱՏՄ և արտաքին առևտրի վարչության պետ Նաիրա Կարապետյանը։
«Արտաքին տնտեսական մարտահրավերները ԵԱՏՄ–ին անդամակցելու առաջին տարիներին թույլ չեն տվել շոշափելի օգուտ ստանալ։ Սակայն դա կարևոր ժամանակաշրջան էր, հենց այդ փուլում մենք ստացանք և ամփոփեցինք 5 պետությունների փոխգործակցության փորձը», – ասաց Կարապետյանը։
Նրա խոսքով` ներդաշնակեցվում է իրավական դաշտը և մշակվում ինտեգրման ալգորիթմները, ինչը ամբողջության մեջ հիմք կդառնա անդամ պետությունների սոցիալ–տնտեսական զարգացման համար, կբարձրացնի ազգային տնտեսությունների մրցունակության մակարդակը և համաշխարհային տնտեսական համակարգում ներգրավվածությունը։
«Փոքր տնտեսություններ ունեցող պետությունների համար այն մասշտաբային էֆեկտ է ապահովվել. ինչպես ազգային արտադրողների, այնպես էլ միջազգային դաշտում երկիրը ներկայացնելու տեսանկյունից», – ասաց Կարապետյանը։
Նրա խոսքով` բարձրացել է նաև երկրի ներդրումային գրավչությունը։ Հայաստանը փոխադարձ առևտրի աճի համոզիչ տեմպեր է ցուցադրում, ինչպես նաև` առևտրատնտեսական հարաբերությունների դիվերսիֆիկացիա։
Միևնույն ժամանակ, ըստ նրա, բոլոր անդամ պետությունները պետք է առավելագույն ջանք գործադրեն ԵԱՏՄ ինստիտուցիոնալ շարունակական զարգացման և աշխուժացման համար։
Հայաստանն իր հերթին, ջանքեր կգործադրի ինտեգրման դրական դինամիկայի պահպանման համար, որպեսզի լրացուցիչ խթան հաղորդվի Միության երկրների տնտեսական աճին։
ԵԱՏՄ առանցքային ինտեգրացիոն ուղղություններից մեկը էներգետիկ ոլորտն է։ Եվ այդ համատեքստում պետք է ակտիվ աշխատել նավթի, նավթամթերքի և գազի ընդհանուր շուկաների ձևավորման ծրագրերի իրականացման վրա։
«Անհրաժեշտ է ջանքեր գործադրել եվրասիական տրանսպորտային ենթակառուցվածքի զարգացման և դիվերսիֆիկացման համար, որը խթան կհանդիսանա Միության ներսում ապրանքաշրջանառության աճի և արտաքին շուկաներ ապրանքների արտահանման համար», – ասաց Կարապետյանը։
Նրա խոսքով` համագործակցության կարևոր ուղղություն է ԵԱՏՄ երկրների IT ընկերությունների ջանքերի համախմբումը տնտեսության բարձր տեխնոլոգիական հատվածի զարգացման և Միության թվային օրակարգի լիարժեք իրականացման համար։
Եվրասիական ԶԼՄ–ների երկրորդ կոնգրեսը մեկնարկել է ապրիլի 24-ին և կավարտվի ապրիլի 26-ին։ ԵԶԲ–ի կազմակերպած միջոցառումն անցկացվում է ՌԴ Տվերի մարզի Կոնակովո քաղաքում։ Կոնգրեսին մասնակցում են ԵԱՏՄ անդամ պետությունների առաջատար ԶԼՄ–ների շուրջ 70 ներկայացուցիչ, ինչպես նաև բանկի ղեկավարությունը, ԵԱՏՀ ներկայացուցիչներ, փորձագետներ։
