Ապրիլի 24-ի վաղ առավոտից մինչև ուշ երեկո դեպի Ծիծեռնակաբերդի հուշահամալիր է ձգվում մարդկանց անվերջ թվացող հոսքը։
24 ապրիլի 2019, 23:08
Հայաստանի ու աշխարհի բազմահազար հայեր, օտարերկրյա հյուրեր ամենատարբեր երկրներից գալիս են այստեղ, հարգանքի տուրք մատուցելու Օսմանյան կայսրությունում Հայոց ցեղասպանության տարիներին տանջահար արված և սպանված միլիոնավոր հայերի հիշատակը։
Մարդկանց ծովում կարելի է տեսնել ինչպես ալեհեր տարեցների, այնպես էլ փոքր երեխաների։ Շատերը հուշահամալիրի մոտ են գալիս ընտանիքներով։
Բոլորը ծաղիկներ են բերում` խոնարհելու Անմար կրակի մոտ և հիշելու նախնիներին, որոնց սպանել են միայն այն պատճառով, որ նրանք հայ էին։
