Մեկ տարի առաջ այս օրը հրաժարականի մասին հայտարարեց Հայաստանի վարչապետ Սերժ Սարգսյանը, որ 2008-18թթ. նախագահական երկժամկետ պաշտոնավարումից հետո էր ստանձնել այդ պաշտոնը՝ ապրիլի 17-ի ԱԺ նիստում տեղի ունեցած քվեարկությամբ: «Նիկոլ Փաշինյանը ճիշտ էր։ Ես սխալվեցի»,-հրաժարականի հայտարարության մեջ նշել էր Սերժ Սարգսյանը՝ մեր երկրին մաղթելով խաղաղություն, ներդաշնակություն և տրամաբանություն:
Տրամաբանության մասին. ՅՈՒՆԵՍԿՕ-ի 28-րդ նստաշրջանում 1995-ին հռչակվեց և, 1996 թվականից սկսած, ՄԱԿ-ի հովանու ներքո, ապրիլի 23-ը նշվում է որպես Գրքի և հեղինակային իրավունքի համաշխարհային օր: Ապրիլի 23-ին, որովհետև համարվում է, որ Շեքսպիրը և Սերվանտեսը այդ օրն են մահացել, չնայած իրականում դա այնքան էլ այդպես չէ:
ՄԱԿ-ն ապրիլի 23-ը հռչակվել է նաև Անգլերենի օր, նշվում է 2010 թվականից սկսած:
Ապրիլի 23-ին, բայց 1836 թվականի, Սանկտ Պետերբուրգում լույս է տեսել Ալեքսանդր Պուշկինի հիմնադրած «Սովրեմեննիկ» (ժամանակակից) գրական և հասարակական-քաղաքական ամսագրի առաջին համարը:
Ապրիլի 23-ը Գերմանական գարեջրի օրն է, ի դեպ: Հետաքրքրականն այն է, որ բավարական հերցոգ Վիլհելմ Չորրորդը 1516 թվականի ապրիլի 23-ին «գարեջրի մաքրության մասին» հրամանագիր է ստորագրել: Այդ փաստաթղթի բովանդակային պահանջները, հասկանալի է, որոշ սրբագրումներով, պահպանվել, գործել և իրավաբանական ուժ են ունեցել ընդհուպ մինչև 1987 թվականը:
1858 թվականի ապրիլի 23-ին ծնվել է գերմանացի ֆիզիկոս, քվանտային ֆիզիկայի հիմնադիր, Նոբելյան մրցանակի դափնեկիր (1918թ.) Մաքս Կառլ Էռնեստ Լյուդվիգ Պլանկը կամ պարզապես՝ Մաքս Պլանկը:
Մաքս Պլանկն առաջինն է գործածել քվանտ եզրույթը, 1900 թվականին՝ սև մարմնի ճառագայթման վերաբերող իր աշխատության մեջ, ըստ այդմ, դնելով քվանտային տեսության հիմքը: Գերմանացի գիտնականին Նոբելյան մրցանակի շնորհելու որոշումն այսպես է ձևակերպվել. ի նշանավորումն ծառայությունների, որ նա մատուցել է ֆիզիկային՝ էներգիայի քվանտների իր հայտնագործությամբ:
Ապրիլի 23-ին Ուկրաինայում նշում են Հոգեբանի, իսկ Թուրքիայում՝ ազգային անկախության օրը:
Իհարկե, այսօրվա հետ կապված հիշարժան այլ իրադարձություններ էլ կան, բայց եթե ուզում եք հիշել, թե կոնկրետ անցած տարի ինչ դեպքեր են տեղի ունեցել Հայաստանում և աշխարհում, կարող եք սեղմել այս հղումը։
