ԵՐԵՎԱՆ, 19 ապրիլի — Sputnik. ԲՀԿ առաջնորդ Գագիկ Ծառուկյանն այսօր ԱԺ–ում լրագրողների հետ ճեպազրույցում հայտարարեց, որ իր ընտանիքին պատկանող բիզնեսներում իրականացվող ստուգումների արդյունքում իրեն ոչինչ չի սպառնում։
«Ծառուկյանին ոչ մի բան չի լինի, քամին քարից ոչ մի բան չի տանի»,– ասաց Ծառուկյանը` հայտարարելով, որ իր օբյեկտներում միշտ են ստուգումներ իրականացնում` և՛ այսօրվա իշխանությունը, և՛ նախորդները։
«Կարեն Կարապետյանն ընկե՞լ էր Ծառուկյանի հետևից, օբյեկտներս 50 հոգով մտնո՞ւմ էին։ Մեքենաները կանգնեցնում էին, նույնիսկ թղթերին չէին հավատում, ցեմենտով բեռնված մեքենաները կշեռքին էին կանգնեցնում` իրո՞ք 16 տոննա է, իրո՞ք 30 տոննա է, թե՞ 2 տոննա պակաս»,– ասաց Ծառուկյանը։
Նա հայտարարեց, որ ինքը կայացած գործարար է, սեփականատեր է ոչ թե 1, 3, այլ 47 բիզնեսի։
Գագիկ Ծառուկյանը վստահեցրեց` թշնամիներ չունի, բայց ունի իրեն նախանձողներ։
«Սաղ նախանձում, տրաքվում են: Նախանձողները գիշերը չեն կարող քնել, այդպես էլ մնալու են նախանձ, չկայացած»,– ասաց նա։
Հիշեցնենք` Գագիկ Ծառուկյանն այսօր ԱԺ ամբիոնից իր անհամաձայնությունն էր հայտնել ցեմենտի մաքսատուրքի բարձրացման մասին օրինագծի ընդունման դեմ։ Ծառուկյանը հայտնել էր, որ «Բարգավաճ Հայաստան» խմբակցության պատգամավորներին հրահանգել է որևիցե անձնական վիրավորանքներ ԱԺ–ի ամբիոնից չհնչեցնել։ Բայց նաև զգուշացրել էր իշխող կուսակցության պատգամավորներին`եթե փորձեն իրենց վիրավորել, տասնապատիկ ավելին կստանան։
